Nongpoh, Jylliew 08: Haba sdang ka lympung ialehkai phubol ia kaba la pynlong da ka Umsong Sports Club ha Ri Bhoi Sepngi, kaba ki la pynlong ha madan ialehkai ka shnong Umsong, ka kynhun ialehkai jong ka Umsong Youngstar FC, ka la ioh ban khur ia ka namjop, kata ka dei hadien ba ki la lah ban pynliem noh ia ka Nongladew B. FC da 1-0.
Ia katei ka lympung ialehkai, la wan ban plie da u Samla Adrian Khain Mylliemngap, President ka Meghalaya Youth Congress Pradesh Committee kum u kongsan, ha ryngkat ka jingdon u samla Phrangsngi Syngkli, President ka Jirang Block Youth Congress Committee, u Alfred Doloi, Chairman ka synjuk ki seng samla shnong Umsong, u samla RC Thangkhiew, President ka Umsong Sport Club lem bad kiwei ki riew rangbah jong katei ka thain.
Khyndiat haba phai sha ka jingiakhun kitei ki artylli ki kynhun, ka la long kaba itynnad namar ki dei ki kynhun kiba iabiangbor bad ka jingiakhun ruh ka dei kaba iakhaid, kaba la pynshongshit wat ia ki paidbah kiba la leit ban sakhi ia katei ka jingialehkai.
Ka jingioh ka Umsong Youngstar FC ba kan khur ia ka namjop ha kaba sdang jong katei ka lympung, ka dei hadien ba ka la lah ban pynliem ia ka Nongladew B. FC da 1-0, ia kaba la thep da uwei u rangialehkai ha ka kylla step jong ka jingiakhun.
U Samla Adrian Khain Mylliemngap, haba u ai jingkren ha katei ka sngi u la ai ka jingiaroh ia ki nongialam ka Umsong Sports Club, namar ba ki la shimkhia ban pynlong ia kaba kum katei ka lympung ialehkai phutbol, kaba long ruh kum shibynta ban kyntiew ia ka sap ka phong jong ki khun samla ka dong ka thain bad kiba don shisha ia kata ka sap ha ka kam ialehkai phutbol.
Nalor kaba u la ai ka jingiaroh sha ki nongialam ka Umsong SC, na ka liang u Samla Adrian Khain Mylliemngap, u la kyntu ruh ia kitei ki rangialehkai ba ki dei ban pyndonkam hok ia ka sap kaba ki don bad ba ki dei ban kiar ruh ha ki jingmlien ban pyndonkam ia ki jingdih kiba sniew, khamtam u drok lem bad kiwei ki jingdih, namar ym tang ba ka pynjot ia u ne ka briew shimet, hynrei ka pynjot ia ka iing ka sem bad ia ka imlang sahlang hi baroh kawei.
KHUR NAMJOP KA UMSONG SC HABA SDANG KA PHUTBOL HA SHNONG UMSONG
