U MLA ka Nongpoh, u Bah Mayral Born Syiem mynta ka step u la leit ban kitbok ïaka kynhun ïalehkai phutbol U-17 ki kynthei jong ka Christian Higher Secondary School Pahamsyiem, ha shuwa ba kin leit ban mih khmat ïaka District sha ka State Level Subroto Cup ka ban sdang ha kine ki khyndiat sngi ha nongbah Shillong.
Naka liang ka kynhun jong ka Christian Higher Secondary School kala long kaba pynkhreh ban leit aireng ha katei ka lympung, bad ryngkat ki jingduwai naka u MLA mynta ka sngi u la leit ban kynduh kyrpang ïa katei ka kynhun ha shuwa ba kan mih naka district bad ban ai ka jingkyntu kynpham ïaki khynnah ïalehkai ha madan Pahamsyiem haka jingdonlang ki nongïalam shnong, ki bor pynïaid skul jong ka skul Christian HSS lem bad ki thei ïalehkai.
Haba kren ha katei ka sngi naka liang u MLA ka Nongpoh u la pynpaw ka jingsngewkmen kaba khraw ïaka kynhun ïalehkai ki kynthei jong ka Christian Higher Secondary School Pahamsyiem kaba la shah jied ban leit shim bynta sha ka State Level kum ka kynhun lahduh haka District Level ba dang shu dep shen bala pynlong da ka ophis u DSO ha Ri-Bhoi hadien ba kala pynliem ïaka Saiden haka jingïakhun phainal jong ki U-17 ki kynthei.
Kum u MLA u la kyntu ruh ïa ki thei ïalehkai jong katei ka skul ba kin kilan bha ïalade ban long kiba sngewrit kiba don akor haba ki mih naka district ban leit shim bynta ha katei ka lympung bad kyrmen skhem ba katei ka kynhun kan wanrah ïa u soh ka jingjop, kaba long ka nam bad ka burom ïaka district hi baroh kawei.
Naka liang u MLA ha katei ka sngi u la aiti ruh da ka song pisa bad ki jersey sha ki bor pynïaid skul kum ka jingïarap ba khyndiat ha kaba ïadei bad ka jinglut jingsep jong ki haba ki leit shim bynta sha katei ka lympung.
