Ha kaba sdang ka U-20 Fourth Division 2024 kaba la pynlong da ka Shillong Sports Association (SSA) mynta ka sngi ha madan SSA First Ground ha Polo, ka Thynroit Sports Club ka la khur ia ka namjop, kata hadien ba ka la lah ban pynliem kput ia ka Mawreng Sports Club haduh 8-1 kol.
Khyndiat haba phai sha katei ka jingiakhun kaba mynta ka sngi, tang ha ka kylla step jong ka jingiakhun, ka Thynroit ka la lah ban thep haduh 3 kol, katba lyngba ki kol jong u Lastingson Lawai, kaba u la thep ha ka minit ba 13, u Silvestar Warlarpih ha ka minit ba 15 bad u Arphrangstone Warlarpih ha ka minit ba 30.
Haba bteng ka kylla miet jong ka jingiakhun, ki rangialehkai ka Thynroit ki la bteng biang ban nion ia ki rangialehkai ka Mawreng, ha kaba ki la bteng ban thep kol lyngba u Carrick Nongrum ha ka minit kaba 56 bad 58, bud kata sa ka kol jong u Cleofast Kshiar ha ka minit ba 66, u Johnly Kharsahnoh ha ka minit ba 67 bad u Fairly Nongspung ha ka minit ba 70.
Na kitei ki 8 kol ia kaba la thep da ki rangialehkai ka Thynroit SC, ka Mawreng Sports Club, ka la ioh ban pynphai tang shi kol, ia kaba la thep da u John R. Nongkhlaw ha ka minit ba 62 jong ka jingiakhun.
Haba plie ia katei ka lympung ialehkai jong ka SSA, la sakhi da ka jingdon ryngkat jong u Bah Banteidor Lyngdoh, President ka SSA, ki nongkitkam ba hakhmat ka SSA lem bad kiwei.
