Ka samla Riiohlang Dhar, ka la shah jied ha ka Federation International Football Association (FIFA), ba kan long kum ka (Referee) ne ki nongpyniaid ha ka FIFA U-17 Women’s World Cup 2024 ka ban long ha ri Dominican Republic.
Ka FIFA U-17 Women’s World Cup 2024, kan sa long ha u Naiwieng mynta u snem, ha kaba ka FIFA ka la jied ia 38 ngut ki Referee na kylleng ki ri ka pyrthei bad ha katei ka thup jong ki 38 ngut ki Referee, na India la ioh ban mihkhmat da ka samla Riiohlang Dhar, kaba dei ruh ka samla kaba ar na India ban iohlad ha ka ban pyniaid ia kiba kum kitei ki lympung ialehkai phubol ka FIFA, kata hadien ka Uvena Fernandes, kaba la long kum ka Referee ha ka FIFA U17 Women’s World Cup 2016 kaba la long ha ri Jordan.
Ka samla Riiohlang Dhar, kum ka Referee ka la dei kaba trei hapoh ka tnat Pulit ka jylla Meghalaya bad ha ka kam ban long kum ka Referee ne ban pyniaid ia ki kam ialehkai phubol ha madan, ka la iohlad ban pyniaid ha kiba bun ki lympung ialehkai kiba la bna nam ha ka pyrthei hi baroh kawei.
Ka jingshah jied ka samla Riiohlang Dhar ha ka thup ki 38 ngut ki Referee ban pyniaid ia ka FIFA U-17 Women’s World Cup 2024, ka la wanrah shisha ia kata ka nam bad burom ia ka jylla bad ka ri India hi baroh kawei.
