SHILLONG, ïaïong 29:  Ka long ka jingioh mynsiem ïa kiba bun ki Hotel kiba don ha Jowai bad ha Tura, ha kaba ka sorkar jylla kan sa pyrkhat kyrpang lyngba ka Subsidy kaba 72-75% na ka bynta ba kin pynbit pynbiang ïa ki Hotel ba ka jylla kan sa pdiang ïa ka National Games 2027 ka ban lang ha ka jylla Meghalaya.

Ïa kane la pynpaw da u Myntri sorkar ba dei peit ïa ka tnad Sports affairs and youth affairs u Bah Wailadmiki Shylla haba kren sha ki lad pathai khubor mynta ka sngi hadien ka jingïakynduh ka Governing Body ka National Games Secretariat Society ha Shillong.

U la ong ruh ba ka sorkar ka la long kaba la kreh ban pdiang ïa ka National Games 2027 bad ki jingpyntrei ïa ki project bapher bapher ki la ïaid shakhmat bad ki don kiba la dep bad ki don ruh kiba dang pyntrei.

U la ong ruh ha ka jingïalang ba la pynïaid da u Myntri rangbah u Conrad K. Sangma la ïa kren sani ïa ki jaka sah ha Shillong ba ki la bit la biang bad la lap pat ki duna ki jaka sah ha Tura bad ha Jowai.

Ban pynbit pynbiang ba kane ka National games kan long kaba jop, ka sorkar lyngba ka tnad Tourism kan sa ai scheme lyngba ka susidy kaba 72-75% ïa ki Hotel ha Jowai bad Tura khnang ba kin lah ban pynbit pynbiang ïa ki Hotel na ka bynta ban pdiang ïa kane ka National games, u la ong.

u la ong ruh kumba long haduh mynta ka sorkar ka la ïaid shakhmat ban pynbit pynbiang lut ïa baroh ki kam kiba ïa dei bad kane ka National Games bad kam shym la lap satia ïa ki jingïarap na ka sorkar kmie ba ka na ka liang ka sorkar ka angnud ban pynlong ïa kane ka lympung kaba jop bad  ba ka sorkar ka khmih lynti ym tang ba kane ka lympung kan long kaba jop bad ka khmih lynti ruh ba ki samla kin ioh rah nam jop ha ki jingïalehkai bapher bapher, u la bynrap.

Shuh shuh, u la bynrap ruh da kaba ong ba ngim don kano kano ka jingartatien ba ngin lah ban pynïaid beit pynïaid ryntih ïa kane ka National Games, kaba dei lyngba ka jingïatrei lang na baroh ki liang kiba don bynta ha kane ka kam, ka ban long ruh ka jingsah jingkynmaw ïa ka jylla.