Shillong, Naitung 27: Haba pynkut noh ia ka 32nd State Level Inter School Karate Tournament ha ka 25 tarik u Naitung 2026 ha Multi Purpose Indoor Sports Hall ka SAI, STC NEHU, ka kynhun ki shynrang na ka Sunrays Secondary School lem bad ki khynnah skul kynthei jong ka Synod Higher Secondary School ki dei ki kynhun kiba la ioh rah ia ka nam lahduh ha katei ka tournament kaba la pynlong haduh 3 sngi kynthih.
Ki skul kiba wan ha ka kynhun baar pat ki kyntrhup ka St. Anthony’s Higher Secondary School na ka liang ki khynnah shynrang bad ka Sacred Heart Girls Higher Secondary School na ka liang ki kynthei.
Ka la long ruh ka jingai mynsiem ia ka Association ha kaba mynta u snem la wan shim bynta haduh 126 tylli ki skul bad ki khynnah kiba la shim bynta ki la kot haduh 802 ngut, kata 391 ngut ki khynnah kynthei bad 411 ngut ki khynnah shynrang.
Sa pule ruh: Weightlifter Mirabai Chandu Clinches First Gold For India
Ki nongjop kiba la khu ia ka nam jop ha kine ka 3 sngi kynthih ki kynthup best Karateka (Boys Junior) ba la rah u Daaron R Warjri, Christian Academy Higher Secondary School, Best Karateka (Boys Senior) Pusaimi Kyndiah, Loompyrdi Iongpiah UP School Jowai, Best Karateka (Girls Junior) Emma T Kharwansuk, Stonyland Secondary School, Best Karateka (Girls Senior) Asenka Beryl Marwein, St. Joseph’s Higher Secondary School.
Ia kane ka tournament la wan ruh ban pynhap pyrda da u Bah Ivan Benson Diengdoh Additonal Superintendent ka Police,East Khasi Hills District kum u kongsan bad u bah Alan Niangti, President, West jaintia District Karate Association kum u symbut kongsan.
Kum ban pynkynmaw, ia kane ka lympung la wan ban plie da u Bah John F Kharshiing Co-Chairman Meghalaya State Planning Board bad u Working President Meghalaya State Olympic Association bad ryngkat ka jingdon lang u General Secretary ka MSOA u Bah Finely L. Pariat, ki nongkit kam ka AMKA, ki nonghikai skul, ki kmie ki kpa bad ki khynnah nongwan iashim bynta.
Sa peit ruh
