Shillong, Jylliew 12: Arngut ki thei ialehkai phutbol ka Jylla, kiba kynthup ia ka samla samla Sanfida Nongrum lem bad ka samla Ribansi Jamu, ki la shah pynkup burom ha ka ka Meghalaya Football Association (MFA), ia kaba ki la pynkup burom mynta ka sngi ha Nongbah Shillong.
Ka nongrim kaba la pynlong ia kitei ki nongialam ka MFA, ba kin pynkup burom ia kitei ki thei ialehkai phutbol ka jylla, ka dei hadien ba ki la ioh ban mihkhmat ia ka ri ha la lympung ialehkai phutbol SAFF Women’s Championship 2026, kaba dang shu dep shen ha Goa, ha kaba ka kynhun ialehkai phutbol ka India, ka la ioh syndon ban rah ia ka namlahduh, hadien ba ka la lah ban pynliem noh ia ka Bangladesh da 3-1 ha ka jingiakhun phainal.
Lehse kaba kham pynkmen eh ia ki nongialam ka MFA, ka dei hadien ba ka Sanfida Nongrumm, kaba dei ka thei ialehkai pdeng ka India, ka la ioh syndon ban khur ia ka khusnam kum ka thei ialehkai kaba tbit tam ha katei ka lympung bad nalorkata, ka la ioh ruh ban khur ia ar-tylli ki khusnam kum ka thei ialehkai kaba tbit ha ki jingiakhun ba ka India ka iakhun pyrshah ia kiwei pat ki ri.
Haba ai jingkren ha katei ka sngi pynkup burom, u Bah Hamlet Dohling u la ong ban don ha ka kynhun ialehkai ka India ka dei ka kam kaba suk, khlem da don ka jingtrei shitom, ka jingminot bad ka jingkohnguh sneng.
Ha kawei pat ka liang, u Bah Hamlet Dohling, u la ai ka jingiaroh ia ka kynhun ialehkai ka India, kaba la ioh ban rah ia ka nam lahduh ha ka SAFF Women’s Championship 2026, nalorkata u la ai ruh ka jingiaroh ia Sanfida Nongrum kaba la ioh ban thep ia ka kol ban pynjop ia ka India ha ka Semi Final bad ioh ruh ban thep kol ha ka jingiakhun Phainal, kaba la pynlong syndon ia ka India ba kan long kum ka lahduh ha katei ka lympung ialehkai.
