Nongpoh, Ïaïong 01: Ka Miss A W Thomas Memorial Secondary School Pynthor  mynta ka sngi ka la lah ban khylliap lama noh ia ka Annual Sports Meet 2026 da ka prokram kaba phuh ba phieng bad kaba la long ka jingjop ia ka thong jong ka skul ban pynrung ia ka mynsiem ieit ia ki kam ialehkai sport bad ban long kita ki nogjop ha kane ka lympung ialehkai sports.

Ia kane ka annual sports meet 2026 jong ka Miss AW Thomas Memorial Secondary School ba la pynlong ha madan Slaikhnang kaba don harud jong ka wah umiam ha shnong Pynthor Bhoilasa la plie pyrda ha ka 30 tarik u Lber 2026 ha kaba la wan ban plie padibah da u Bah Ransom Sutnga uba la pynpaw ia ka jingsngewnguh ia U Blei namar ka jingshakri jong ka Miss AW kaba long kawei na ki Missionary kaba bun na ki balang ha ka them Ribhoi kidei ki matti ki jong ka.

Ha ka sngi pynkut mynta ka sngi ia kane ka Annual Sports Meet la wan ban pynhap pyrda da u Bah Damanbait Lamare, MLA  ka Umroi Constituency kum u kongsan ha ryngkat ka jingiadon lang jong ki dkhot ka SMC kiba kynthup ruh ia u Pastor SL Marwein Chairman SMC, Pro Pastor CS Shylla, Tbn W.Radu, Tbn JS Kharlukhi , ki riew rangbah lem bad ki kimie ki kpa jong ki khynnah skul.

Haba ai jingkren kum u kongsan u Bah Damanbait Lamare u la ai mynsiem ia ki khynnah skul ba kin long kiba trei shitom khnang ba kin lah ban kynjoh sha ki kyrdan kiba kham shalor, ym tang haki jingpule hynrei wat haki jingialehkai sports ruh kumjuh, namar kumba ka long mynta kiba bun na ki riew pawnam ha ka pyrthei kidei hi ki nongialehkai sports.

U la pynpaw ruh ba u don ka jingkhmih lynti bad jingangnud ba shisien ka sngi ngin lah ban iohi ia ki khynnah jong ngi ha ki rynsan jong ka sports kiba heh haka ri bad haka pythei hi baroh kawei.

La pynkut iakane ka sngi da ka jingsam ia ki khusnam sha ki nongjop ha ki jingialehkai bapher bapehr bad ruh ka jingpynhiar lama bad ka jingrah lama da ki School Captain.