Nongpoh, Jylliew 21: Ban pynkhreh ïa ka International Yoga Day kaba ju rakhe ha ka 21 tarik u Jylliew man la u snem, ka Ribhoi District Yogasana Sports Association ryngkat ka jingïatreilang bad ka Mera Yuva Bharat Ribhoi ka la pynlong ïa ka prokram ai jinghikai Yoga ha Balawan College, Umsning bad lawan ban ïashimbynta daki Spah Ngut ki samla pule jong katei ka college.
Shibynta na kane ka prokram, la pynlong ruh ïa ka jingbam smai bad ka jingïasoi kyrteng ban pynskhem ïa ka jingïatreilang ban rat diengkhong ïa ki jingdih bad jingbam ba pynbuaid lyngba ka Program Nasha Mukt Bharat Saptah, kaba la pynïaid da ka Ophis District Social Welfare, Ribhoi.
Ha kane ka jingïalang la sakhi lang da ki nongkitkam jong ka Ribhoi District Yogasana Sports Association ba kynthup ïa u President samla Wanborlang Malngiang haka jingïadon lang ka Samla Priscyla Shongwan Vice President, Finance Secretary samla Alfred Doloi, Mamunie Diengdoh Treasurer, Samla Babylon Lyngdoh Organising Secretary, samla Mirable Kshiar Publicity Secretary lem bad kiwei kiwei.
Ka phang pdeng jong ka International Yoga Day ha une u snem ka long “Yoga for Healthy Ageing”, kaba thmu ban pynsngewthuh paidbah ïa ki jingmyntoi kiba bun jong ka Yoga naduh ka koit ka khiah, ka jingnang pynkhlaiñ bor ïaka met bad kumjuh ruh ïaka bor pyrkhat.
Ki nongkitkam ka Association ki la ong ba kane ka prokram kam dei tang ban pynsaphriang ïa ka jingtip shaphang ka Yoga, hynrei ka long ruh ban wad bad pynsei ïa ki samla kiba don sap ha kane ka jingïalehkai, khnang ban pynkhreh ïa ki bad ban nang pyntbit shuh shuh ba kin ioh ban mihkhmat na ka jylla ha ka lympung National Games ka ban sa long shen.
Sa peit ruh
