Shillong, Iaiong 09: Ki nongialam bad dkhot ka Green Tech Foundation mynta ka sngi kila tur syndon sha ka khyrdop Secretariat ha Nongbah Shillong na ka bynta ban pynpaw ka jingpyrshah halor ka rai jong ka Sorkar ban tei  ia ka Taj Umiam resort and Spa ha Pung Umiam bad kynthup iaka  Dewlynnong Lumpongdeng.

Naduh dang step ki nongialam ka Green Tech Foundation ha ryngkat ki Pla Card kila ia tur sha ka khyrdop Secretariat daka jingthmu ban rung shapoh hynrei namar ka jingdon noh ki Pulit, kim shym la ioh lad ha kaba la pynlong ia ki ban ia ieng ne ia khih da kaba rah rah Pla Card ha rud ka surok .

Kum ban pynpaw, Kane ka sienjam ba la shim da ka Green Tech Foundation ka dei namar ka jingbym patiaw ka Sorkar halor ka jingdawa ban pyndam noh ia ka project ha ka dewlynnong Lumpongdeng ha pung Umiam.

Na ka liang u Chairman ka Green Tech Foundation u Bah H Bansiewdor Nonglang u la ong ba ka jingiakhih jong ki, ka long kaba shong nongrim, namar ka jingdawa jong ki ka long beit thik tang ia u Lumpongdeng, kaba dei ka jaka kaba heh 36 akar.

U la ong ruh, ba kum ka tnad tourism ka dang don ki jaka ban wanrah ia ki project bad kim pyrshah ia kata, hynrei kaba ki ieng ban pyrshah ka long ban iada beit ia ka dewlynnong Lumpongdeng, bad ki long kiba kloi ruh ban shong patok halor kane ka nongrim.

Shuh shuh, u la ong ruh, ba lada ki pulit ki kem bad set patok kum u nongialam u kloi ban shong shah thngan khlem pud ha patok halor kane ka mat ban iada ia u Lumpongdeng.