Tura, Jylliew 16: La sakhi ba ka jylla Meghalaya mynta ka thnem bha ka jingiaksaid ban ia pynbeit ne ban ia dawa bhah kyrpang lyngba ka Job Reservation Policy, khamtam kaba la mih jingiania pan bhah hapdeng ka jaidbynriew Garo, Khasi Jaintia, mynta la mih pat sa ki jaidbynriew Muslim, Hindu, Bihari, Nepali bad kiwei kiba la pynpaw ia ka jingthrang ban ioh bhah kam lang ha kane ka jylla Meghalaya.
Kine ki jaidbynriew, Muslim, Hindu, Bihari, Nepali bad kiwei ki dei ki bar jylla kiba sah la slem hapoh ka Ri lum Garo.
Kane ka jingpan bhah, na bynta kiwei pat ki jaidbynriew la paw pyrthei, hadien ba u MDC barim ka Garo Hills Autonomous District Council (GHADC), u Sofior Rahman, u la dep ban phah ia ka jingthoh sha ka Expert Committee da kaba ai jingmut ruh ba kine ki jaidbynriew (Indigenous Non-Tribal Community) ki dei ban ioh bhah lang ha kane ka Job Reservation Policy na ka 7.5 persen jong ka 15 persen ba la buh ha ka Open Category.
Lah ban phaikhmat, ba ha ka State Job Reservation Policy, la ai bhah 40% ia ki Khasi Jaintia, 40 % ia ki Garo, 5 % ia kiwei ki riewlum bad 15 % ia ka General Category.
NANG KHLUIT KA JINGIATAI HALOR KA RESERVATION POLICY HA MEGHALAYA, PAN BHAH SA KI MUSLIM, HINDU, BIHARI, NEPALI
