Nongpoh, Nohprah 21: Ki heh nongialam ka Ri Bhoi Youth Federation (RBYF), hynnin ka sngi ki la ioh ban pynskhem ia ki nongkitkam ka RBYF Umbir Unit, kaba dei ruh ka Unit kaba dang shu pynkha thymmai hapoh katei ka shnong.
Ia kitei ki nongkitkam ka Umbir Unit, la leit ban pynskhem da u Bah RJ Thangkhiew, Political Secretary ka RBYF Sengkmie, ha ryngkat ka jingdon u Bah Bulletstar Marbaniang, General Secretary, u Bah Elvis kharbani, u Bah Kynsai Nongneng bad ruh u Bah SW Rymbai, MLA barim ka Umroi.
Ki nongkitkam ka Umbir Unit, ki kynthup ia u Bah Joe Kharthangmaw kum u President, u Bah Daminot Marbaniang, General Secretary lem bad kiwei.
Haba kren ha katei ka sngi, ki heh nongialam ka RBYF, ki la kyntu ia kitei ki dkhot ba dang shu rung sha ka RBYF, ba ki dei ban trei na bynta ka bha ka miat hapoh ka shnong ka thaw bad ruh ba ki dei ban don ka jingiatrei kaba iajan eh bad ki paidbah, khamtam eh bad ki nongialam shnong.
