Nongpoh, K’lyngkot 16: Ki nongialam lem bad ki nongkyrshan kiba don hapoh ka Lama jong ka Umroi Constituency Progressive Forum (UCPF), mynta ka sngi, ki la pynlong ia ka jingialang ha kawei ka jaka ha Umroi Umdohbyrthih bad lyngba katei ka jingialang, ki la rai ban khylliap Lama noh bad pynduh pyndam noh ia ka UCPF ha Umroi Constituency.
Ha katei ka jingialang kaba la donlang da ki nongialam ba hakhmat ka UCPF, kiba kynthup naduh u Bah Pynskhemlang Sohtun, President ka UCPF, u Bah Remius Kharsati, Vice-President, u Bah Forstar Sohiong, General Secretary lem bad shibun kiwei pat ki nongialam bad nongkyrshan ka UCPF, ha kaba lyngba jong katei ka sngi, haba ki la dep ban khylliap ia ka Lama ka UCPF, ki la rai ban leit ai jingkyrshan noh ia u Bah M.D Syiem, u Kyrtong MDC ka Congress na Umroi Constituency.
Haba kren sha ki lad pathaikhubor, u Bah Pynskhemlang Sohtun, u la ong ba ka nongrim kaba la pynlong ia ki ba kin leit kyrshan noh sha u Kyrtong Congress, ka dei namar ba ki la shah buh jingkylli palat ha ki paidbah ha ka por ba ki leit ban ialap Ilekshon, ha kaba ka jingkylli na ki paidbah, ka long ba shano u Kyrtong ka UCPF un leit kyrshan ne iasoh party, haba u la jop na katei ka Constituency.
Kumta ki nongialam ka UCPF, haba ki la iohsngew ia kaba kum katei ka sur na ki paidbah, ki la pynlong ia ka jingialang la katto katne sien hapdeng ki para nongkitkam bad nongkyrshan ka UCPF bad ha kiba kum kita ki jingialang, la mih ka sur ba lada long kumno kumno ruh, la dei ban leit ai jingkyrshan noh sha u Bah M.D Syiem, u briew uba la ïoh ia ka ticket ban iakhun na ka Party Congress.
Na ka jingkren jong kitei ki nongialam ka UCPF bad kiba la rai ban kyrshan noh sha ka Congress, ki la ong ba ka jingrung paidbah sha ka Party Congress, kan long ha ka 21 tarik mynta u bnai ha madan Umroi, ha kaba ki la kyrpad ia kiwei ruh ki nongkyrshan ba kin wan sakhi ha katei ka sngi, ba kan don ka jingrung paidbah sha ka Party Congress bad ruh kaba long ruh kum shibynta ban pynithuh paidbah ia u Kyrtong ka Congress na Umroi Constituency.
