Nashik, Maharashtra, Jylliew 04: Kawei ka Jet thma jong ka tnad Air Force kaba la tip kyrteng kum ka Sukhoi MK III Jet Fighter ka la hap bad bthei noh ha kawei ka madan kaba don ha ka Nashik District hapoh ka jylla Maharashtra, kane ka jingjia ka la jia mynta ka sngi ka 2 tarik u Jylliew 2024.
Katkum ka khubor ba la iohlum, ha kane ka jingjia hap bad bthei katei ka Jet thma, ar ngut ki pilot kiba niah ia kane ka fighter jet ki la lait thaw na ka jingiap hadien ba ki la lah ban sei noh ialade (Safely Eject) napoh kane ka jet thma hashwa ba kan hap bad bthei ha katei ka jaka hynrei kine ki pilot ki la mynsaw malu mala bad la rah ban phah sumar hapoh ka HAL Hospital, iathuh ka khubor na ki pulit.
Ka khubor ka iathuh ruh, ba ia kane ka Jet thma la niah da u Wing Commander Bokil bad u Co- Pilot Biswas kaba hap bad bthei ha kawei ka madan ha ka shnong Shirasgaon ha ka por 1.20 baje eiei janmiet.
Ki heh ophisar jong ka tnad Indian Air Force, bad ki nongtrei ba dei khmieh jong ka HAL unit ki la leit mar mar sha katei ka jaka ba bthei katei ka Jet thma bad ruh ban pynlong ia ka jingtohkit halor kane ka jingjia.
BTHEI KA JET THMA JONG KA TNAD AIR FORCE, LAIT THAW KI PILOT
