Ki nongialam ka Khasi Students Union, South West Khasi Hills District ba kynthup ia ka Saw Symper Circle, Lawbah Area Circle bad ka KSU Border Area Circle ha ka 4 tarik Risaw, ki la mih shakhmat ban iakhih da kaba shong kynllaiñ mongor ha madan Malki ban pynbor ia ka sorkar jylla ban kyntiew kyrdan noh ia ka Mawsynram sha ka Civil Sub Division.
Kumba la sakhi, da ki spah ngut ki nongialam bad nongkitkam ka KSU ki la mih ban shong kynllaiñ mongor ha ryngkat ki poster ba la thoh pyrshah ia ka jingsngap mynthi jong ka sorkar jylla ban pynurlong noh ia ka jingangnud ki paidbah ka Mawsynram ban ioh noh da ka Sub Division kaba pura.
Na ka liang u samla Samborlang Shabong, President ka Lawbah Border Area, u la ther tyngeh da kaba ong, ba ki bor ka sorkar jylla ka la shu sngap man man ia ka jingdonkam u paidbah ban ioh noh da ka Civil Sub Division kaba pura na bynta ka jingmyntoi jong ki paidbah ha Mawsynram, namar ka Mawsynram Block ka dei kaba la shakri mynta la bun bun tylli ki snem bad ka la deihok ban ioh ia ka jingithuh ban kyntiew kyrdan noh ia kane ka Block.
U la ther ruh, ia ki nongmihkhmat ka Mawsynram kiba la shu pynbiej man ka san snem ia u paidbah, da kaba shu kular khlem pynurlong ia ki khamtam ha kaba ia dei bad ka jingdonkam ban kyntiew kyrdan noh ia ka Mawsynram Block sha ka Civil Sub Division, lada kane ka jingdawa kam urlong, na ka liang ka seng kam banse ban shim pat da kiwei ki lad ki lynti khamtam ban sangeh ban iatreilang ha kino kino ki programme jong ka sorkar jylla.
“Ka jingkyntiew kyrdan ia ka Mawsynram sha ka Civil Sub Division kan plie lad ruh ia ki samla wadkam wadjam ban ioh ia ki kam katkum ki kyrdan jingpule jong ki bad kaban pynmyntoi shikatdei ruh ia u paidbah ha kaba ia dei bad ki kam shakri bapher bapher”, pynpaw u nongialam ka KSU.
