Nongpoh, Jylliew 03: 5 ngut ki dkhot jong kawei ka iing ba kynthup ïaka kmie bad 4 ngut ki khun kila kem pang kynsan hynnin ka miet hadien ba kila bam ïa u tit khlaw, haka por bam ja miet haka dong Nongkyndang, jong ka shnong Saiden ha Ri-Bhoi District.
Napdeng kitei ki 5 ngut bala kem pang 2 ngut la pynkit noh sha Bethany Hospital Nongpoh kiba la kham shitom jur bad 3 ngut la pynkit sha Nongpoh Civil Hospital.
Kitei ki 5 ngut naka juh ka iing kiba la kem pang kynsan ki kynthup ïaka kong Larita Syiemlieh (kmie), bad ki khun ba kynthup ïa u Wanphrangsngi syiemlieh (23), Daniki syiemlieh (16), Larikynti syiemlieh (14) bad u Da-u-Rijied Syiemlieh (3).
Kumba la ioh jingtip halor katei ka jingjia ka kmie bad ki khun kila bamja lang haka janmiet jong ka 2 tarik Jylliew haka por 8 ne 9 baje eiei bad bam ruh ïa u tit bala kheit na kawei ka khlaw haka thaiñ Umran ha Ri-Bhoi, bad hadien ba kila dep bam uwei napdeng jong ki u la sdang ban kem pang bad kynroi prie bad dei haka por 10 ne 11 baje ka jingshitom kala nang jur bad baroh kila shoitom haduh ba hap ban pynkit noh sha jaka sumar.
Kumba long mynta ka kmie bad ki khun ki dang don hapdeng ka jingshah sumar ha Nongpoh Civil Hospital bad ha Bethany Hospital Nongpoh.
Kem pang kynsan ka kmie bad 4 ngut ki khun naba bam tit khlaw ha Nongkyndang Ri-Bhoi
