Nongpoh, Risaw 18: Kum shi bynta ban ai mynsiem ia kiba bun ki khun samla ka thaiñ Nongpoh kiba pyrshang ban ieng ha la ki kjat lyngba ki jingseng kam seng jam lajong, ka Kong Rona Khymdeit MDC ka Nongpoh mynta ka sngi ka la leit ban ai mynsiem ia kawei na ka tamasa synrai ba la pynlong iew pynlong hat ha Nongpoh Town Shopping Complex.

Kum ban pynkynmaw, katei ka Nongpoh Town Shopping Complex, ka dei ka jaka ba don bun ki dukan lane ki stall ba la wan rah da ka sorkar kum ka lad ai kam ai jam ia ki samla ha kum kane ka juk kyrduh kam kyrduh jam, hynrei baroh shi katta katei ka iew ka kynjah bad bun  kiba ym ju plie dukan, hynrei ban pynshlur ia ki nongdie dukan ban plie man la ka sngi la pynlong ia kane ka iew synrai kaba long shi bynta ban kyrshan ia ki nongshong dukan ba kin lah ban pyniaid ia ki mar ne ki tiar ki tar kiba die ha katei ka iew.

Na ka liang ka Kong Rona Khymdeit kum ka MDC ka Nongpoh mynta ka sngi ka leit ban ai mynsiem ia katei ka tamasa ba la tip kum ka Nongpoh Autunm Shopping Carnival ba la pynlong da ka Committee katei ka Shopping Complex.

Na ka liang ka Kong Rona Khymdeit haba kren ha kane ka sngi, ka la ai khuble ia ka Committee jong kane ka Shopping Complex bad kumjuh ruh ia ka ophis u deputy Commissioner ka Ri Bhoi bad dei lyngba ka jingiatrei lang  la lah ban pynlong ia kane ka Nongpho Autumn  Shopping Carnival, kaba dei kawei na ka iew tamasa ban kyrshan ia ki nongshong dukan ban pyniaid iew ia ki mar ne ki tiar ki tar ba die ha kitei ki dukan.

Kum ka nongmihkhmat paidbah, ka la buh ruh ka jingkyrpad ia ki paidbah ka Nongpoh bad jong ka District hi baroh kawei ba kin wan ban shim bynta ha kane ka tamasa synrai jong jong ka iew ka hat bad ka jingwan kyrshan jongki, ka long ban kyrshan ruh ia ki khun samla kiba pyrshang ban ieng ha la ki jong ki kjat lyngba ki kam seng kam seng jam la jong.

Shuh shuh, ka la ai ruh ka jingkular ban dang ia trei ryngkat nangne shakhmat na ka bynta ban kyntiew ia katei ka iew paidbah kaba don ha Nongpho Town Shopping Complex bad ka kymen skhem ruh ba katei ka iew kan iaid iew nangne shakhmat lyngba ka jingiasnoh kti lang na baroh ki liang, ka la bynrap.

Ha kane ka sngi, kum ka jingai mynsiem ka kong Rona Khymdeit ka la leit ruh ban jurip ia ki dukan bapher bapher ba la buh ha kane ka iew tamasa synrai kaba long kum ka jingai mynsiem bad ruh ryngkat ka jingkyrpad sha ki paidbah ba kin ai kata ka jingkyrshan ia ki samla kiba seng kam seng jam la jong.