Meghalaya, Jylliew 7:
U Dr. WR Kharlukhi, uba dei u dkhot jong Ing Dorbar Thawain ka Rajya Sabha mynta ka sngi u la wan ban pynhap pyrda noh ia ka jingrakhe dap 25 snem lane kata ka Silver Jubilee kaba ki ong ha ka ktien nongwei, jong ka skul Jowai Presbyterian Higher Secondary School.
Ha kane ka sngi la wan ban sakhi lang ruh da ka jingiadon ryngkat jong u MLA ka Jowai, u Bah Wailadmiki Shylla ha ryngkat ka jingiadon lang jong ka Principal ka skul, ka Kong Yoodamika Lytan, U Daloi ka Jowai Elaka, ki nongialam niam, ki khynnah skul barim, ki nonghikai lem bad ki khynnah skul.
Haba ai jingkren ha kane ka sngi, u Dr. WR Kharlukhi u la ai ka jingiaroh ia ki nongpyniaid jong ka skul kiba la shimkhia ban pyntyllun bad pyniaid beit ia kane ka skul wat hapdeng shibun ki jingeh kiba kum ki nongialam ki mad na ka por sha ka por. U la ai ruh ka jingiaroh sha ki nonghikai jong kane ka skul hapoh kiba la lenlade bad pynsaphriang ban ai ia ka jingnang jingstad sha ki khynnah skul naduh ba la seng ia kane ka skul ha u snem 1999.
