Bym Biang Kot Biang Sla, Pynher Krad Ka KSU Bad FKJGP Da Ki Spah Ngut Ki Dribar Trok Bar Jylla Ha War Jaintia

Shillong, Jylliew 10: Ki kynhun sengbhalang ba kynthup ïa ka Khasi Students’ Union (KSU) West Jaintia Hills District Unit ryngkat ka KSU War Jaintia Circle lem bad ka Federation of Khasi-Jaintia and Garo People (FKJGP), West Jaintia Hills mynta ka sngi ki la pynlong da ka jingkhynra kaba jur ïa ki Trok bar jylla kiba wan kit mar sha ka thain War Jaintia.

Ha kane ka jingleit khynra kitei ki seng, ki la lap ia ka jingjyllei ki trok bar jylla ba la kot da palat 200 tylli kiba la shu wan kamai khlem da don ne pynbiang ia ki kot ki sla ba kynthup naduh ki Trading License bad kiwei kiwei ki kot ki sla Kali.

Ha kane ka jingkhynra, kitei ki 2 seng hadien ba la lap ba kitei ki Trok Bar jylla kim shym la don ïa ki kot ki sla, ki la pynher krad bad khanglad ban wan kamai sha ka thain War Jaintia.

Haba kren halor kane ka jingjyllei ki Trok bar jylla ba wab kamai sha War Jaintia, u President ka KSU West Jaintia Hills District Unit u Samla Laitphar Syngkrem u la ong ba kane ka jingïoh wan kamai sahuh ki bar jylla ka long ka jingknieh ïa ka lad kamai jong ki trai ri trai muluk.

Sa pule ruh: Yn Jur Slap Ha WJHD Ha Kine Ki Khyndiat Sngi, Maham Ka DDMA Ki Paidbah Ki Dei Ban Husiar

U Samla Laitphar u la maham ruh ïa kino kino ki trai par maw ne ki nongkhaïi bad nong shalan maw sha Bangladesh ba kim dei ban ai jingïada ïa ki bar jylla kiba wan kamai khlem ki kot ki sla kiba biang bad maham ruh ba lada jia eiei ïa kine ki bar jylla kito kiba wanrah ki dei ban shim ïa ka jingkitkhlieh.

Ha kawei ka bynta, u la kren bynñiaw ruh ïa ka jingbym ai shuh ka sorkar ïa ka ILP bad ong ba kum ka seng kan ym man thait ban shim hi ïa ki lad jingïada na ka jingwan ki mynder sha kane ka ri ba ieid. Shuh shuh la ong ba kum ka Jaidbynriew kim dei satia ban ai jaka rieh ïa ki bar jylla namar ki long kum ki ‘seiñpuh kiba lah ban puh ha kano kano ka por lada ki la sngew khlaiñ bor.

Na ka liang u General Secretary ka FKJGP West Jaintia Hills u Samla Nangkhraw Rani, u la pynrem jur ïa ka jingbym shim khia ka JHADC ban teh lakam ïa ki trok bar jylla kiba kamai khlem ki kot ki sla katkum ka aiñ ba la pynkup bor kaba ïadei bad ka jingwan khaïi pateng da ki bar jylla.

U la ong ba kane ka jingwan ki trok bar jylla ym tang ba ki la wan kamai khlem ki kot ki sla hynrei ka long ruh ka jingknieh ïa ka kamai kajih jong ki trai muluk ba im ja kpoh na ka kam ñiah trok.

Sa peit ruh