Jowai, Jylliew 19:
Ka jingiakhih jong ki paidbah kaba la lamkhmat da ka Joint Action Committee (JAC) kaba hap ha ka Elaka Narpuh jong ka East Jaintia Hills District ka sdang hynne ka step nadud ka por 7 baje ha kaba ki paidbah ba kynthup naduh ki samla kynthei, shynrang, ki longkmie ki longkpa ki la mih sha surok wat hapdeng ka jing hap jong u slap ban ai ia ka jingkyrshan halor katei ka sienjam kaba la shim da ka JAC.
Kum ban shu kdew hangne, kadaw kaba la pynlong ia ka JAC bad ki paidbah ka thain ban shim ia kane ka sienjam ban pynlong ia ka jingiakhih da kaba pakhang ia ka surokbah National Highway 6 khlem buh pud ha katei ka thain kadei hadien ba ki katei ka surok ka la jot shaba palat pud bad dap tang da ki thliew ki syar suda mynta la bun snem.
Lyngba katei ka jingiakhih kaba la ioh ruh ia ka jingkyrshan na kiba bun ki nongialam, ki seng bad ki paidbah ka thain, ka jingthmu ka long ban pynbor ia ka sorkar ba kadei ban kyndit thiah, ban phah shna noh mardor ia katei ka surokbah National Highway 6 naduh na Tongseng ter ter shaduh Malidor, bad ki la rai ruh ba katba ka sorkar kam pat leh eiei, na ka liang ka jongki, kin iakhih beit wat lada kadei ban shong bad pakhang surok da ki bnai ruh.
Ka jingleh mynthi jong ka sorkar jylla ban maramot ia katei ka surok, kala buh jingeh haduh katta ia ki paidbah kiba pyndonkam ia katei ka surok kaba ym ikop shuh ban khot kum kata ka National Highway, namar la jan ha baroh shilynter ka la jot rathai bad ki don pat ki jaka kiba la long kum ka wah rit bad kaba ym ilong shuh wat tang ban iaid kali ruh.
