Shillong, Jylliew 19:
Ka jingtih khyndew beain ha ki shnong Mawsmai, Baridua, Khanapar bad Maikhuli jong ka Ri Bhoi District da ki ‘riew shimet kamdei shuh kaba dang thymmai bad kaba ju mih naka por sha ka por ha ki lad pathai khubor. Wat lada na ka liang jong u Deputy Commissioner ka Ri Bhoi, u Arpit Upadhyaya u la pyntip sha ki lad pathai ba u la shim ia sienjam ban pynduh ia kine ki beain, hynrei, la iohi ba ka jingtih khyndew pathar ka dang iaid beit tad haduh mynta mynne.
Da ka jingsngewkhia halor kane ka jingtih khyndew pathar bad pynjot ia ki lum ki wah, uwei u nongiasaid ain jong ka jylla, u Bah Enlang Sawian u la leit ban ujor syndon sha ka Meghalaya Human Rights Commission (MHRC) ba kadei ban shimkhia halor kane ka jingtih khyndew pathar kaba beain bad ban pynshitom da kaba tyngeh ia ki briew kiba donkti, khnang ba kum kine ki kam beain kin duh jaid syndon.
Utei u nongiasaid ain, u la ong ruh ba manla u briew u don ia ka hok ban im ha ka mariang sawdong sawkun kaba khuid kaba suba bad ki paidbah kim dei ban shah pynduh noh ia kane ka hok ka jongki, tang na ka bynta jong ki katto katne ki ‘riew shim kabu bad khwan myntoi shimet.
Wat lada na ka liang jong ki paidbah kiba shah ktah, ki ju ujor na ka por shaka por sha ki bor pyniaid District ka Ri Bhoi halor kitei ki jingtih khyndew beain, hynrei u Bah Enlang Sawian u la kynnoh ba ki bor pyniaid District ka Ri Bhoi kim shimkhia satia ban pynshitom ia kiba donkti halor kane ka kam beain katkum ki kyndon ain.
U la ong ruh ba ka jingtih khyndew pathar ka ju wanrah ruh ia ka jingtwa khyndew, ka jingshlei um bad ka jingtuid jong ki khyndew, kaba wanrah pat ia ki jingjot jong ka ing ki sem jong ki paidbah, ka jingduh jong ki bar post ilektrik, ki pipe um, ka jingdap khyndew jong ki nala pyntuid um.
Kumba la sakhi, ka jingtih khyndew beain bad pom pathar ia ki dieng ki siej ha kitei ki thain kadei shisha ka mat kaba paw pyrthei la bunsien lyngba ki lad pathai khubor, hynrei wat hadpeng bun ki jingujor, kine ki kam beain ki dang iaid beit kat haduh ba ki lum ki la kylla madan bad pynduh lut ia ki tyllong um jong ki paidbah nongshong shnong, ia kaba u Bah Enlang Sawiang u la ong ba kane ka jingtih khyndew beain kaba la palat liam da kaba pyndonkam da ki puh shilum, ka la wanrah ruh ka jingkyrduh um kaba khraw, haba ki paidbah da ka jingbym banse ki hap ban pyndonkam da ka um ka bym long kaba jaboh, nalor ka jingjaboh jong ka lyer bad kiwei kiwei de ki jingeh kiba ki paidbah ki hap ban mad.
