Nongpoh, Nohprah 11: Nalor ka jingjaboh ka lyer ba ka Byrnihat ka iohnam, ki paidbah ha katei ka thaiñ ba kynthup bun tylli ki shnong naduh Byrnihat shaduh Umpher ki kynduh mawsiang sa ka jingshlei um kaba ju jia man ba wan ka aiom slap, kaba la buh jingeh shikatdei ïaki paidbah ha katei ka thaiñ.
Halor katei ka jingeh naka liang u Bah Sosthenes Sohtun MLA ka thaiñ ba dei ruh u Myntri ka tnad C&RD, ryngkat u Deputy Commissioner u Abhilash Baranwal, haka jingdonlang u Bah Erick Dkhar BDO ka Umling C&RD Block lem bad ki ophisar ka NHAI mynta ka sngi kila leit ban jurip ïaki jaka pyntuid um ki nala ban weng ïaka jingeh ba ki paidbah ki ïakynduh naka por shaka por ha kaba ïadei bad ka jingshlei um.
Haba kren sha ki lad pathai khubor hadien ka jingjurip naka liang u Bah Sosthenes Sohtun u la ong ba kum u nongmihkhmat ryngkat u DC bad NHAI kila jurip khnang mynta ka por ba tyrkhong ba ym dei shuh ban ap haduh da slap hynrei dei ban weng mardor ïa kitei ki jingeh kiba ki paidbah naduh ka thaiñ Byrnihat haduh ki thaiñ Umpher ki ju kynduh mawsiang naka jingshlei um.
U la ong ruh ba katei ka jingjurip kala long kaba seisoh, ha kaba naka liang ki ophisar ka NHAI bad bor district kila shimkhia ïa katei ka kam ban weng mardor ïaka jingeh ki paidbah bad ban shna ki nala kiba biang ba ka um ka lah ban tuid bha.
Shuh shuh naka liang ka NHAI kala pynthikna ruh ban shna ar tylli ki jingkieng Foot Overbridge ha Byrnihat Proper bad kumjuh ruh ha Nongthymmai 15 mer naka bynta ban pynsuk ïaki paidbah ban jam na shilliang surok sha shilliang khamtam kitei ki jaka ki dei ruh ki jaka ba bun briew bad ruh ban pynitynnad ïaka surok bah National Highway naduh Jorabat haduh Byrnihat.