Da ki spah ngut ki paidbah riewngeit Muslim ki la duh noh iala ka jingim hadien ka jingkiew kynsan jong ka jingshit ka mariang ha ka jingleit pikrim Hajj ka jongki sha ka nongbah Mecca, kawei na ki jaka ba kyntang jong ka niam Islam kaba don ka ri Saudi Arabia, la ong tyllong khubor ha ka sngi Balang katba ki paidbah ki dang ialeh ban kam iala ki baieid bathoin kiba la duh noh iala ka jingim.
Na ka liang jong ki bor sorkar ka Saudi Arabia kim shym la kren eiei halor kane ka jingiap jong ki spah ngut ki riewngeit, hynrei la iathuh ba da ki spah ngut ki paidbah ki la ieng lain hakhmat jongka Emergency Complex ka Al-Muaisem, kaba don marjan bad ka nongbah Mecca, na ka bynta ban ioh jingtip halor ki bahaing hasem ki jongki kiba la jah.
Katkum ki tyllong khubor, kiba la saphriang ha ka internet, la iathuh ba kidon palat 550 ngut ki riew ngeit Muslim kiba la khlad hadien ba ka jingshit ha kane ka jaka ka kiew haduh palat 47⁰ Celsius ha ka sngi Ba ar bad kumba 51.8⁰ Celsius hapoh ka Grand Mosque kaba don ha Mecca. La iathuh ruh ba naka liang uwei u nongsumar u bym kwah ban pynpaw kyrteng ha katei ka jaka, u la iathuh ba ki don palat 600 tylli ki metiap kiba don ha ka jaka buh metiap jong ka hospital Al-Muaisem.
Kum ban shu kdew hangne, kane ka jingiaid pilkrim Hajj kaba shisien manla u snem katkum ka Islamic Calender, ka ju la khring da ki lak ngut ki riewngeit Muslim na kylleng ka pyrthei ban ioh poi sha katei ka jaka kaba la khein kyntang bha ha ka niam Islam bad bunsien, kiba duna ha ka ioh ka kot, ki ju pyrshang ruh ban leh da ki kam buit tuh bad beain ban ioh leit sha katei ka jaka, khlem da pynbit pynbiang ia ki kot ki sla na ki bor sorkar bad ruh ki jingdonkam ban sumar ia ka koit ka khiah.
Tang mynta u snem 2024, ki don haduh palat 10.83 lak ngut ki riew ngeit Muslim kiba leh ia ka pikrim Hajj ba kynthup ia kumba 10.6 lak ngut ki pilkrim kiba la wan na ki 22 tylli ki ri jong ka pyrthei, la iathuh ka tyllong khubor jong na Saudi Hajj.
