Shillong, K’lyngkot 02: Ka DGP ka jylla Meghalaya ka kong Idashisha Nongrang mynta ka sngi ka la leh burom ia ki Pulit IPS  kiba la ioh ban kiew kyrdan, ha ka jingialang kaba la long ha Conference Hall ka tnad Pulit ha Shillong.

Ka Kong Idashisha Nongrang kum ka Heh Pulit ka Jylla, ka la shim ia ka bynta ba kongsan ban pynkup burom ia kitei ki Pulit IPS ka jylla bad ban pyndait ruh ia ki jingdeng (Epaulettes) ha ki tyrpeng jongki, kiba dei katkum ka kyrdan kaba ki la ioh bat ha ka tnad Pulit.

Na ka liang ka DGP ka Kong Idashisha Nongrang kum ka heh pulit ka jylla, ka la ai ka jingkhublei kaba kyrpang ia kine ki heh pulit  kiba la ioh ban kiew kyrdan bad ka kitbok kitrwiang ruh ia ki ba kin dang lah ban ai ka jingshakri kaba paka sha ki paidbah kumba la bynshet kam ia ki katkum ka kyrdan kaba kit bat ha ka tnad Pulit ka jylla.