Nongpoh, K’lyngkot 02: Kumba la bynshet da ka sorkar ban peit ia ka bha ka miat bad ban wan rah ia ka shongsuk shongsain ha ka imlang ka sahlang, ki Pulit ka Ri Bhoi khlem da ioh lad ban pynlut por ha ïing ha sem bad la ki baieid ba thoiñ ha ka miet jong ka 31 tarik u Nohprah 2025 kum ka jingiai ap ban pdiang ia u snem thymmai 2026  ki la mih sha surok ban pyndap ia la ka kam ram ban pyrkhing ia ki Kali ba pynkheiñ aiñ khnang ban shngaiñ ki paidbah ha ka leit ka wan bad khatam ha ka jinglehkmen ia u snem thymmai.

Ia kane ka jingtalasi ia ki Kali paidbah ba leit ba wan lyngba ka surokbah National Highway-6 ha Ri Bhoi la ialam da u Senior Superintendent of Police ka Ri Bhoi U V.S Rathore bad la ia don lang naduh ki pulit ophisar bad ki wei kiwei ki pulit.

Kum ban pynkynmaw, shuwa ban mih madan sha surok ban tehlakam ia ki kali ba pynkheiñ aiñ, ki Pulit ka Ri Bhoi ki la dep maham lypa sha baroh ba kim dei ban pynkheiñ aiñ ha ba niah ia ki kali ha ki surok ne ha kane ka jingpdiang ia u snem thymmai bad ban pyndep ia la ka kamram ki pulit ki la bat naphang ia ki Kali ban talasi ia kito kiba pynkhein ain.

Ha kane ka jingtalasi, ki pulit ki la ioh ban bat bad ban dain kuna ia bun ki Kali ba pynkhein ain ba kynthup naduh ki nongniah ba dih buaid, kiba pyndonkam ia ki ïit ïong, kiba ym deng ia ki seat belt, kiba pyndonkam ia ki Light LED bad kiwei kiwei, ha kaba khlem map ki hap ban siew ia ka kuna kiba la pyngngat katkum ki kyndon jong ka ain.

Lyngba jong kane ka jingtalasi kali hapdeng ka jingkhriat jong ka miet, ki Pulit ki la ioh ruh ban talasi ia kawei ka Kali sorkar ba don ia u number ML 01 B 0202, ba la shah bat ha u SSP na ka daw ka jingtah ïit ïong kaba khlem da ioh bor satia, ha kaba u SSP u la phah tar bad u la phah weng ruh ia ka Siren ba la pyndonkam beain khlem da ioh jingbit na ka sorkar.

Kane ka jingtalasi kali ka dei ruh ka jingtalasi kali kaba khatduh ha ka jingialam u VS Rathore kum u SSP ka Ri Bhoi, ha kaba mynta un mih noh na Ri Bhoi District ban leit shimti pat ia ka kam kum u DIG ka Eastern Range hadien ba u la ioh kiew kyrdan.

Lyngba jong kane ka Talasi, ki Pulit ka Ri Bhoi ki la leh kmen ruh ban pdiang ia u snem thymmai, da kaba ot cake ha surok hadien ba la pyndep ia kane ka jingtalasi ia ki Kali, kaba long ka jingshngain ia ki paidbah ha ka jingpdiang ia u snem thymmai 2026.