Nongpoh, K’lyngkot 04: Ka jingïasnohkti hapdeng ki Pulit ka Ri Bhoi bad ka Dorbar Shnong Umrang Umjaren ka la long ka jingmyntoi kaba khraw ïaki paidbah nongshong shnong hadien ba ki pulit kila leit ban pynsngewthuh ïa ki paidbah halor ki aiñ bad ka jingïada ïa ka shongsuk shongsain ha ki shnong ki thaw haka shnong Umrang Umjaren.

Ha katei ka jingïalang ki paidbah nongshong shnong naduh ki rangbah, ki longkmie-longkpa bad khamtam eh ki samla shnong kiba la wan ban sngap bad ban ïoh jingïasngewthuh na ki ophisar Pulit halor ki kyndon aiñ bapher bapher.

La don lang ha kane ka sngi u Rangbah Shnong ka Umrang Umjaren, u Bah Bonifast Ramde, u Secretary ka Synjuk ki Rangbah Shnong Umrang Area u Bah Bistocan Timung, lem bad kiwei pat ki nongïalam shnong bad ki riew rangbah.

Na ka liang ki Pulit ka Ri Bhoi, la mihkhmat da u Bah S. Lyngdoh Inspector, ka Kong W. Khongsit Second In-charge, Umsning PS bad u Bah A. Ramde Sub Inspector kiba la shim bynta ruh ban ai jingpynshai paidbah halor shibun ki aiñ kiba ki nongshong shnong ki dei ban tip bad ban bud ryntih.

Ki aiñ kiba la batai kham bniah ha kane ka sngi ki kynthup ïa ka POCSO Act, kaba khang pyrshah ïa ka jingthombor ïa ki khyllung khynnah, bad ka NDPS Act, kaba dei ka aiñ kaba khang pyrshah ïaki kam khaii drok. Ki Pulit ki la kyntu ïa ki paidbah ba kin sngewthuh ïa ka jingdonkam jong kine ki aiñ bad ban jingïatreilang bad ki bor aiñ ban pynneh ïa ka jingïasuk bad jingïalong jingïajan hapoh ka shnong.

Lyngba kane ka jingïalang bad jingpynshai paidbah, bun na ki nongshong shnong ki la pynpaw ïa ka jingsngewkmen namar ba ki la ïoh ban sngewthuh kham bha ïa ki aiñ bad ïa ka bynta kaba ki paidbah hi ki don ban jingïatreilang ban wanrah ïaka shnong ka thaw kaba lait naki kam sniew bad ki kam thombor.