Nongpoh, K’lyngkot11: Haba leit ban shim bynta kum u wei naki samla rangbah ka dong Ri-Bhoi, u Bah Liander Nongshli u ba dei ruh u Working President ka RBYF u la leit ban ai mynsiem ïaki khun samla jong ka Balang katholik haka janmiet jong ka sngi Saitjaiñ haka 6th Youth Convention jong ka Zone VI ka Balang Catholic ha Umkadhor Parish halor ka phang pdeng “U Krist ka jingkyrmen jong ngi” ba la sot na ka shithi u Paul sha u Timothy na ka lynnong kaba 1:1.

Katei ka Youth Convention ka dei kaba la sdang naduh ka 9 tarik bad pynkut noh haka 11 tarik Kylla Lyngkot hapdeng ka jingiphuh iphieng kaba dei ruh ka jingïakynduhlang jong ki khun samla man la u snem ba hap ha ka Zone-VI kiba kynthup ïa 6 tylli ki parish, ka parish Umsiang, Umden, Nongpoh, Byrnihat, Umgtyrnga bad Umkadhor Parish.

Naka liang u Bah Liander Nongshli u la shah khot sngewbha ruh kum u kongsan haka prokram pynisap kaba la long haka sngi Saitjaiñ ba kum ki samla kila mih ryntih ban shim bynta bad pyni ïala ki jong ki sap bapher bapher ba ki don bad kum ka jingai mynsiem la sam ruh da ki khusnam shaki nongjop.

Ha kane ka sngi la sakhi ruh da ka jingdonlang u Fr. Kynsai Kurbah, Assistant Parish Priest ka Umkadhor, u Emelius Maioing, President ka Zone-VI, u Iolines Syiem General Secretary bad la wan ban pynshongshit ruh da u Bah Anthony Jana da jingrwai bapher bapher.

Kum u kongsan haba kren ha kane ka sngi u Bah Liander Nongshli u la ong ba ka jingim samla ka long kaba eh hynrei ha kum kata ka por ki dei ban khmid ïala ki khmat shalor ban phai sha u Blei namar u Blei u long u ba khraw ban pynkylla ïa kiei kiei haka jingim, ban long ki samla kiba don ka jingkitkhlieh ïaka kam u Blei, ïaka iing ka sem bad ka imlang ka sahlang ban tei bad ai mynsiem de ïa kiba heprit kiban dang heh dang san.

U la ai ruh ka jingïaroh ïaki khun samla ka Balang halor ka sap bapher bapher kaba ki don ban pynpaw sha ka pyrthei khamtam ka burom u Blei ba kum ki samla kin nang san ha u Blei ryngkat ka sap kaba ki don khnang ba kin long kiba seisoh haka jingim jong ki.