Nongpoh, K’lyngkot 10: Ka Ri Bhoi District Congress Committee (RBDCC) ryngkat ka Meghalaya Pradesh Congress Committee (MPCC) lyngba ka jingbthah na ka All Indian National Congress Committee (AICC) lyngba ka ‘MGNREGA Bachao Sangram Programme’, ki la rai beit ban mih paidbah ban pyrshah da kaba tyngeh halor ka jingpynkylla kyrteng ka sorkar BJP ia ka skhim MGNREGA sha ka Viksit Bharat – Guarantee For Rozgar and Ajeevika Mission Gramin, Act 2025, (VB-GRAMG Act 2025).

Haba kren sha ki lad pathai khubor mynta ka sngi ha Nongpoh, u Bah Rocky Marwein kum u President ka Ri Bhoi District Congress Committee bad u Bah Jonathan Syiem, Vice President ka Meghalaya Pradesh Youth Congress, ki la ong kumba la bthah da ka AICC lyngba ka MGNREGA Bachau Sangram, ki pyrshah jur ia ka jingpynkylla kyrteng ka sorkar BJP ia ka skhim MGNREGA sha ka Viksit Bharat – Guarantee For Rozgar and Ajeevika Mission Gramin, Act 2025 ha kaba kane ka jingpynkylla kyrteng ka long kum ka jingiuhroit ia ka hok ki paidbah  nongshong shnong.

Ki la ong ruh ba kane ka jingmih ban pyrshah ia kane ka jingpynkylla kyrteng ka sorkar BJP ia katei ka skhim MGNREGA lane ka hok jong u paidbah, ka dei hadien ka jingialang kaba la long ha ka 8 tarik ha Congress Bhavan ba ki la shim ia kawei ka rai ban pyrshah beit ne ia khih paidbah halor kane ka jingpynkylla kyrteng ka sorkar BJP ia katei ka skhim, namar kane ka jingpynkylla kyrteng ka la long kumba khein bein ia ki paidbah nongshong shnogn ka jylla bad ka ri kiba la ioh jingmyntoi lyngba kane skhim lyngba ki ka pynroi bapher bapher sha ki shnong nongkyndong bad ruh ka jingioh bylla sngi haduh 100 sngi kumba la pynkup bor  ha kane ka skhim ne ka Act ba la wan rah da ka sorkar Congress.

Ki la ong ruh naduh ba la wan rah da ka sorkar Congress ia kane ka skhim lane ka Act ha u snem 2005 kiba bun ki shnong nongkyndong ha ka ri India ki la kylla dur lyngba ka jingtuid ki kam pynroi ba la pyntreikam ha man la ki shnong nongkyndong, hynrei naduh ba la ioh bat sorkar ka party BJP ha u snem 2014 la mih ki jingpynkylla ha ki rukom treikam bapher bapher bad ka BJP ka la shu mushlia lut wat ia kane ka skhim ba ki paidbah nongshong shnong ka ri India ki ioh jingmyntoi.

Ki la ong ruh ha ka por ba synshar ka Congress ia ka pisa la mang beit sha ki Village Employment Council (VEC) bad mynta pat la pynkylla lut ia ka rukom treikam haduh ba bun ki shnong kiba pyntreikam ia kane ka skhim ki la dap ram dam shah na ka daw ba ka sorkar BJP kam lah satia ban pynlait ia ka mang pisa ha ka por kaba biang.

Ki la bynrap ruh da kaba ong, ba kane ka jingpynkylla ha ka rukom treikam bad ka jingpynkylla kyrteng ia katei ka skhim kaba dei ka hok u paidbah ka la ktah wat ia ka jingmang tyngka sha ki shnong bad khamtam ha ki jylla shatei lam mihngi ka ri, namar ka sorkar BJP ka la pynkylla lut ia ka rukom treikam ba ki paidbah mynta ki hap ban shondur shwa ban pyntreikam ia ki skhim bad ruh da la dep trei, ka jinghap ban register kito ki jobcard Holder,  ban pyniasoh ia ki Adhar card bad hap pyndonkam ia kata ka online link kaba la buh jingeh kaba la wan rah jingeh shisha ia ki nongshong shnong ha ki shnong nongkyndong.

Da kaba pyrshah jur halor ka jingpynkylla kyrteng bad ruh ka jingpynkylla ha ka rukom treikam kane ka skhim, kitei ki nongialam ki la ong ruh ba ka partry ka Congress ka dawa na ka sorkar BJP ba ka dei ban pynlait noh shi syndon ia ka pisa ba ki shnong ki la sah ram sah shah na ka daw ka jingbym pynlait pisa ha ka por kaba biang bad shuwa ban pynteikam thymmai dei ban weng lut ia ki ram ki shah ba sah ram ki shnong ba kynthup naduh ka jingthied ia ki tiar ki tar (Materials) bad ka bainong sha ki nongbylla (Wages).

Shuh shuh, halor kane ka jingialam bakla ka sorkar BJP ban pynkylla kyteng ia katei ka skhim MGNREGA, ka party Congress kan nym kynran dien bad kan mih shakhmat ban pynlong da ka jingiapyrshah ne ia khih ha ki District bad ki jylla bapher bapher ba kane ka jingpynkylla kyrteng bad pynkylla ia ka rukom treikam ka long kumba la iuhroit ia ka hok ki nongshong shnong, ha kaba na ka liang ka party Congress ka khot ka wer ia baroh ki paidbah ban ia snoh kti lang na ka bynta ban pyrshah ia kane ka jingleh donbor ka sorkar BJP, ki la bynrap.