Nongpoh, K’Lyngkot 12: Ka Synjuk ki Rangbah Shnong Ri Bhoi District mynta ka sngi ki la leit syndon ban ia kynduh ia u Deputy Commissioner ka Ri Bhoi bad ruh ia u Superintendent of Police ka Ri Bhoi, na ka bynta ban pynpaw halor ki mat ki jura ba ka Synjuk ka pynpaw sha kine ki heh ophisar ka Ri Bhoi kiba long na ka bynta ka jingbit jingbiang ki paidbah ha Ri Bhoi District.
Ha ka jingkynduh ia kitei ki heh ophsiar ka Ri Bhoi la ialam da u Bah B.B Makdoh kum u President ka Synjuk ki Rangbah Shnong Ri Bhoi District bad u Bah P.B Sylliang kum u General Secretary ryngkat ka jingdon lang ki dkhot ba ki la kynduh ia u Deputy Commissioner ka Ri Bhoi u Abhilash Baranwal bad ruh ia u Superintendent of Police ka Ri Bhoi u Giri Prasad ban paw halor ki mat ba kum ka Synjuk ka wan rah sha kine ki ophisar kiba dei ki mat na ka bynta ka jingmyntoi ki paidbah ha Ri Bhoi District.
Ki mat kiba ki la pynpaw hakhmat u Superintendent of Police ki kynthup ba ka tnad Pulit ka dei ban dang bteng ban tehpyrkhing ia ki Kali ba pynkheiñ ain bad kumjuh ruh ban ai ka jingiatrei lang na ka bynta ban ia khun pyrshah ia u Drok bad kiwei kiwei kiwei ki kam sniew ha ka District.
Ki la pynpaw ruh ba ka tnad Pulit ka donkam ban ai ka jingiatrei lang bad ki Nongialam Shnong bad ruh ban dang pynkhlain ia ki VDP ha man la ki shnong, khnang ban lah ban ia khun pyrshah ia ki kam sniew bad kiwei kiwei ki kam kiba ktah ia ka shongsuk shongsain ki paidbah.
Ha ka jingiakynduh ia u Deputy Commissioner ka Ri Bhoi, ka Synjuk ka la pynsgew halor ka jigneh ki paidbah ha kaba ia dei bad ka jingpyntreikam ia ka skhim JJM sha man la ki shnong bad ki paidbah pat kim ioh satia ia ka umbam umdih bad ruh ka synjuk ka la kyrpad na ka sorkar jylla ha kaba lyngba u Deputy Commissioner un shim khia lem ban ia kren ban pynlait noh ia pisa Material jong ka skhim MGNREGA ba ka sorkar BJP ka la pynkylla kyrteng sha ka VB-G RAM G Act 2025.
Ha kane ka sngi, ka Synjuk ka la pynsngew ruh sha u Deputy Commissioner ban shim khia halor a jingpynslem ban tei noh ia ki 7 tylli ki Foot Overbridge ha Ri-bhoi District, ba ka NHAI haduh mynta kam pat pyni dak satia ban sdang noh ia ka kam.
Ka long ruh ka jingkmen ia k Synjuk, ha kaba ha kane ka jingiakynduh ia u Deputy Comissioner bad ia u Superintendent of Police, ba ki la kular ban shim khia halor kitei ki mat ba la wan rah da ka Synjuk bad ka Synjuk ka khmih lynti ba kitei ki jingdonkam ka de ban urlong noh na ka bynta ka jingmyntoi ki paidbah ha Ri Bhoi District.