Shillong, K’lyngkot 13: U Bah AL Hek MLA ka BJP naka jylla Meghalaya mynta ka sngi u la leit ban ïakynduh ïa u National Working President ka BJP ba dang shu shah thung shen u Nitin Navin ban ïakren halor ka jingïaid lynti ka BJP haka jylla Meghalaya bad kumno ban dang pynkhlaiñ shuh shuh ïaka party ha kane ka jylla.
Lyngba kane ka jingïakynduh naka liang u Bah AL Hek u la ioh ruh ban tai sani ban ïakren halor kumno ban pyniar ïa kane ka party haka jylla naduh tynrai ba ki paidbah kin sngewthuh lyngba ki kam pynroi bad kane ka dei ka mat kaba hakhmat eh napdeng bun ki mat bala ïakren.
Naka liang u Nitin Navin kum u National Working President u la kdew shai ruh ba ka BJP kala nang pynjur ïaka jingkyrpad sha ki paidbah ba kin sngewthuh halor ka nongrim ka party ryngkat ka jingkyrmen ba ka party kan pynmih bun ki nongmihkhmat ha u snem 2028 kumba la ïathuh lypa da u State President ka Jylla Meghalaya u Rikman G Momin haka jingïakren ba dang shen bad ki nongthoh khubor.