Nongpoh, K’Lyngkot 13: Ka kur Lyngdoh Nongkdait, Warmawsaw bad Umsohbar, ha Ri Bhoi District  mynta ka sngi ki la pynlong da ka dorbar kur ha ka shnong Warmawsaw kum shi bynta ban wanrah ia ka jingiatylli bad jinglong kawei hapoh ka kur bad ruh ban ia kren halor shibun ki kam ban kyntiew iaka long briew ka man briew hapoh ka Kur.

Ha kane ka sngi kum ka jingai mynsiem ki khun ki pyrsa kiba dang khie dang san bad kiba dang donkam ruh ban wad ia ka jongnang ka jingstad, kum ka kur ki la pynlong ruh ia ka jingpynkup burom bad ka jingsam khusnam sha ki samla Jong ka kur kiba la wan sha khmat ha ka eksamin SSLC 2025.

Ki samla kiba la ioh pdiang ia ki khusnam ha kane ka jingpynkup burom ki kynthup ka samla Mebalaaihun Lyngdoh, ka samla Badahun Lyngdoh, u samla Franky Lyngdoh bad u samla Bawallamlad Lyngdoh.

Ha kane ka sngi la ai jingkren ruh da u Bah Bisrol Lyngdoh ha kaba kum u Kñi u la ai ka jingsneng ka jingkraw ia ka kur hi baroh kawei, ba kum ka kur ka hap ban don ka jingiatylli bad ka jingkitkhlieh na ka bynta ban kyntiew ia ka bha ka miat jong ka kur hi baroh kawei.