Shillong, K’lyngkot 13: Ki Pulit ka Nongbah Shillong tang hadien ba la saphriang kawei ka dur khih ha ki rynsan Social Media ba la kynnoh ba uwei u Home Guard Volunteer u la don kti ha kaba dawa pisa na ki briew ba na Assam bad ha ka jingtohkit mynta ka sngi ki la kem noh ia utei u Home Guard Volunteer ban leh katkum ki kyndon jong ka ain.

Une u home Guard Volunteer la tip kyrteng kum u Reganson Kharlor (35) bad u dei uba trei ha Madanrting Traffic Branch Shillong bad kane ka jingjia ka la paw pyrthei ka dei tang hadien ba la saphriang ka dur khih ha ki rynsan social media ba la kynnoh ba utei u Home Guard u la pynsangeh ia kawei ka Kali ha ryngkat ki tien sieh bad dawa pisa ruh na kitei ki briew bah shong ha katei ka Kali Maruti 800 kaba don ia u number AS 01-F-1460.

Haba kren sha ki lad pathai khubor, u SP ka East Khasi Hills u Bah Vivek Syiem u la iathuh ba kane ka jingjia ka la paw pyrthei tang hadien ba katei ka dur khih ka la saphriang ha ki rynsan social media bad kane ka jingjia ka la jia naduh ka 26 tarik u Nohprah 2025.

U la iathuh ruh dei lyngba ka jingtohkit la lap ia ka jingshisha ba utei u Home Guard Volunteer  ula don kti ha katei ka kam ban pynsangeh ia katei ka Kali ban dawa pisa haduh T. 1 lak, da kaba kynnoh ba katei ka Kali ka la pynkhein ia ki kyndon niah kali bad u la iathuh ruh dei hadien ka jingiakren bad kitei ki briew ha kaba khatduh u la dain kuna T. 15 hajar da kaba kynnoh ba ki la pynkhein ai ki kyndon ain niah kali.

U Bah Vivek Syiem u la iathuh ruh ba halor kane ka jingjia, ki la dep ban kem ia utei u Home Guard Volunteer bad la register case ha Madanrting Police Station pyrshah ia u hadien ba la la ujor da ka Suo-moto bad ba la pyngngat ha ka Sections 308(5), 351(2) and 352 jong ka Bharatiya Nyaya Sanhita. U la ong ruh ba la dep weng kam ruh ia utei u Home Guard Volunteer bad hadien ka jingtohkit kaba bniah yn sa tian bishar ia u sha ka ïingbishar katkum ki kyndon jong ka ain.

Na ka liang u Bah Vivek Syiem u la buh ruh ka jingkyrpad ia kitei ki briew kiba la ia kynduh ia katei ka jingjia ban wan shakhmat ban kren ia ka jingshisha  bad na ka liang ki Pulit ki la dep ruh ban peit bniah lyngba ka CCTV ban tip kham bha halor kane ka jingjia.

Shuh shuh, u la bynrap ruh wat la ki don kum kine ki briew kiba pynjah burom ia ka tnad Pulit ka jylal bad na ka liang ki Pulit jong ka East Khasi Hills kin dang iai bteng ban ai ka jingshakri kaba bha tam ia ki paidbah da ka jingshakri kaba khuid kaba suba bad ruh ka tnad Pulit kan dang peitngor bha ban tehlakam ia kum kine ki kam dawa pisa, ki kam pynjah burom bad ka jingpyndonkam bakla ia ka bor ba la pynkupbor da ka sorkar, u la bynrap.