Nongpoh, Jylliew 20: Ka Ri Bhoi Youth Welfare Organization (RBYWO) kum kawei naka kynhun seng bhalang na Ri Bhoi mynta ka sngi ka la pynpaw ia ka jingpyrshah kaba jur, halor ka jingthmu ka sorkar Meghalaya lyngba ka Investment Meghalaya Authority ban pynlong biang ku kata ka Industrial Estate ha ka jaka jong ka Soil and Water Conservation bad ka tnad Agriculture kaba don ha 13mer Byrnihat.
Kane ka seng ka la mih shakhmat ban pyrshah halor kane ka jingthmu ban pynlong ia kata ka jaka ba la tip kum ka Industrial Estate da ka jingthmu ban kyntiew kyntiew ia ka ioh ka kot ka jylla, ka dei hadien ba ka seng ka la iohi lyngba ka jingmih ha ki lad pathai khubor.
Haba ia kren mynta ka sngi sha ki lad pathai khubor, u President ka RBYWO, u Bah Ban Kharnaior, u la ong ba ka seng ka da pyrshah jur halor kane ka jingthmu ka sorkar lyngba ka Investment Meghalaya Authority ba la khlieh da u Vijay Kumar kum u IAS bad CEO ba la phah ia ka jingthoh sha ka tnad soil and water conservation bad kumjuh ruh sha ka tnad ka kam rep ka kam riang ban pan ia katei ka jaka kaba don 137 akar ha 13mer Byrnihat na ka bynta ban pynlong ia ka kum ka Industrial Estate.
U la ong ruh ha ka jingshisha ka jylla Meghalaya ka la don lypa kita ki Industrial Estate kawei kaba don ha Byrnihat bad kawei ha Umiam bad kumba long haduh mynta ki paidbah kim ioh jingmyntoi satia bad ym iohi ba kan kyntiew ia ka ioh ka kot bad kaei kaba ki paidbah ki mad ka dei ka jingmad ia ki lyer jaboh, ka jingktah ki jingthung jingtep bad ka koit ka khiah ki paidbah lyngba ki lyer jaboh ba mih na kitei ki karkhana.
“Kum ka seng ka pyrshah jur ban pynlong ia kane ka jaka jong ka soil and water conservation bad ka tnad Agriculture ha 13mer Byrnihat ban pynlong biang ia katei ka jaka kum ka Industrial Estate bad shuwa ban pyntreikam ia kitei ki jingthmu ka sorkar ka la dei shuwa ban ai ka jingpynshai paidbah sha ki paidbah” ong u Bah Ban Kharnaior, President ka RBYWO, bad bynrap ruh katba ka sorkar kam pat lah ban ai jingpynshai paidbah halor katei ka jingthmu kum ka seng kan pyrshah jur bad ka dawa ruh na ka tnad soil and water conservation bad na ka tnad Agriculture ba kim dei ban ai jaka na ka bynta ban pynlong kum kata ka Industrial Estate” u la bynrap.
Shuh shuh, na ka bynta ban pyrshah halor kane ka jingthmu ka sorkar, ka seng ka la dep ruh ban phah da ka shithi ujor sha ka myntri ka jylla ba dei peit ia ka tnad Agriculture bad ruh sha u Director ka Soil and water conservation ba kim dei ban ai jaka, namar kitei ki jaka ki dei kiba la pyndonkam lypa na ka bynta ka tnad soil and water conservation bad kumjuh ruh na ka bynta ka tnad Agriculture kaba dei kyrpang na ka bynta ki nongrep bad ki paidbah ka jylla.
PYRSHAH KA RBYWO BA THMU KA INVESTMENT MEGHALAYA AUTHORITY BAN PYNLONG INDUSTRIAL ESTATE HA BYRNIHAT
