Shillong, K’lyngkot 16: Ka Sorkar Jylla hynne ka sngi lyngba ka kynhun ki Myntri sorkar kala rai ban pynrung ia ka Subject ‘Community Integrated Skill Learning’ haki skul ban hikai iaki khynnah Class VI haduh Class X.

Iaka Subject Community Integrated Skill Learning’ yn pynrung hapoh ka subject Health and Physical Education kaba ju don lypa bad ki khynnah ki donkam ban nang ia kano kano ka sap ne ka kam (Skill) na la iing ne na ka imlang sahlang.

Haka subject ‘Community Integrated Skill Learning’, u lane ka hynnah ki lah ban jied ban shah hikai ia ka kam kaba ki kmie ki kpa ki ju trei, kum sap shet jingbam lada ka kmie ka nang shet jingbam (Baking), ka sap shna jingshna na u kpa, ne ka kam rep kam riang.

Haba pynbna ia kane u Myntri Rangbah ka Jylla u Conrad K Sangma u la pynshai ba kane ka Subject ‘Community Integrated Skill Learning’, ka thmu ban pynthikna ba ki khynnah kin bit kin biang ha ki kam kiba lah ban kyntiew ia ka ioh ka kot jong ki.

U Conrad u la ong ba kane kan iarap iaki khynnah ban nym kyntait ia ka kam kaba ki kpa ne ki kmie ki trei, bad ban pynneh pynsah ia ki kam tynrai ka longiing.

“Kane kan pynlong ia ki khynnah ban iasyllok bad iatrei lang bad ki kmie ki kpa, kaba pynkhlain ia ka jingiadei hapoh ka longing ka sem nalor ka ioh kam ioh jam hadien ha bud” la ong u Conrad.

U Conrad u la iathuh ba 50% na ki mark baroh jong kane ka subject yn ai halor ka jingshim bynta jong u lane ka khynnah ban nang ia kano kano ka sap ne ka kam (Skill) na la iing ne na ka imlang sahlang.

“Kane ka long ka rukom pule kaba pher kaba ngi khot ka ‘Community-based Skill Program’. Hangne, ka imlang sahlang, ki kmie ki kpa bad ka longing hi ki long ki nonghikai. Ki khynnah ki lah ban nang kumno ban rep, ban ri jingri bad kiwei kiwei ki kam kiba long ka matti tynrai” u la ong u Conrad Sangma.