Shillong, K’lyngkot 16: Bun ki nongshong shnong ba shong basah bad ki paidbah ba leit ba wan mynta ka janmiet ki la her syrngiew ban iohi ia ka ding kaba shyrkhei kaba la klang ha jan ka Anjelee Cinema Hal ha Iewmalong, Shillong,  ha kaba kane ka jingjia la antad ba ka jia ha ka por 5 baje ei ei janmiet.

Kumba la sakhi bad iohi, ba kane ka jingkem ding kynsan ha katei ka jaka ka la long kaba ishyrkhei bad ka la pynher syrngiew lut ia baroh ki paidbah ba leit ba wan ha Iewmawlong bad khamtam kito kiba shong ing bad kiba shong dukan ha jan katei ka jaka.

Kumba long haduh mynta, ym pat lah ban tip thikhna ia ka daw ka jingkem ding ki ing ha katei ka jaka bad ym pat lah ban tip ruh la ki la don neem kiba mynsaw ne shah ktah ha kane ka jingpluh ding.

Halor kane ka jingjia, ki Kali Pylip Ding bad ki Pulit Pynlip Ding ki la wan poi mardor sha katei ka jaka na ka bynta ban tehlakam ia ka ding kaba la klang bad kumba long haduh ynta ki  Pulit pynlip ding ki dang ia khun borbah ban synreit um ia kitei ki ing kiba la kem ding ha katei ka jaka.

Na ka liang u MLA u Bah Sanbor Shullai ruh u la wan poi sha katei jaka ban wad jingtip halor kane ka jingjia bad ruh ban peit bniah ia kiba la shah  ktah ha kane ka jingpluh ding ki ïing.