Shillong, K’lyngkot 19: Ka Khasi Students’ Union (KSU) mynta ka sngi ka la ai por tang shi taiew ia ka MPSC ban pyntreikam thymmai ia ka rukom treikam kaba dei katkum kaba la mynjur da ka MPSC Reforms Committee ha ka kahipod ba la phah sha ka sorkar ha u snem ba la dep bad ban pynthikna ia ka jingthungkam thungjam kaba khuid kaba suba.

Haba kren sha ki lad pathai khubor mynta ka sngi, u Chairman ka KSU Employment Cell u Samla Reuben Najiar, u la ong ia ka kaiphod la dep ban phah sha ka sorkar ha bnai August 2025 bad kam don kano kano ka jingkylla ban pyntreikam ia ka rukom treikam kaba thymmai kaba la pynlong ia ka KSU ban kynduh noh mynta ka sngi ia u Chaiman ka MPSC u Bah D. Langstang.

“U Chairman ka Commission u la ong ba ki dang tohkit bniah ia kane ka kam bad ym pat da ioh ban bishar bniah ia kane ka kam. Ka jingmynjur ka dei na ka bynta ka mPSC ban pyntreikam ia ki rukom treikam thymmai” ong u Samla Najiar ha kaba pynpaw ia ka jingsngewkhia halor ka jingslem ban pyntreikam ia ka rukom treikam thymmai.

U la bynrap ruh da kaba ong, ba ka KSU ka la ai por ia ka MPSC tang hapoh shi taiew ia ka rukom treikam kaba thymmai bad kaba ia dei ruh ba ka jingpynpaw ia ki Marks ki samla wad kam bad kiwei kiwei ki rukom treikam kiba la pynpaw ha ka kaiphod, khnang ba kane kan wan rah ia ka jingkhuid ka jingsuba halor ka rukom thungkam thungkam hapoh ka MPSC ha kaba kumba long haduh mynta kam don kata ka jingkhuid jingsuba ha ka thungkam ka thungjam.

U la ong ruh ba ka KSU ka dawa ban pynpaw ia ki Mark, ki Objective-Type jong ka examination thung na ka bynta ki Grade-C bad D.

Da kaba kynnoh ba ka MPSC ka wan rah shibun ki buit treikam tang ban ioh ban leh buittuh ha ki examination thungkam, ong u Samla Najiar, “Kawei na kane ka nuksa ka dei ka typist examination ba la pynlong ha u Bnai November 2025. U la ong ruh ba ka MPSC ka leh mynthi ban pyntreikam ia ka rukom treikam kaba khuid ba suba, namar ba kim ioh ban leh thok leh shukor lada pyntreikam da kata ka lynti kaba khuid kaba suba.

Shuh shuh, u la ong ruh ba ka KSU kan nym salia ban pynlong da ka jingiakhih lada ym lah ban pyntreikam ia ka rukom treikam kaba thymmai hapoh ka shi taiew kumba ba la ai por da ka Seng bad ruh wat ban pynsangeh ia ka jingthungkam thungjam lada ym don kata ka jingkylla ha kaba pyntreikam ia ka rukom treikam ba thymmai kuba la pynpaw haka shithi ba la aiti sha u Chairman ka MPCSC.