Nongpoh, K’lyngkot 17: Ka Kong Bindas Syiem kum kawei ka longkmie na ka Shnong Mawlong kaba la don bynta ha kaba shah thngan ha Secretariat na ka bynta ban dawa siang rong ia ka surok Nongpoh kaba pyniasoh shaduh ka shnong Umden Nongtluh mynta ka sngi ka la pynpaw ia ka jingsngewkhia kaba jur, hadien ba la lap ba ka don ka jingtrei torti ha kaba siang rong ia katei ka surok bad kaba dei ruh hadien ba la sapriang ka dur khih jong ka jingsiang rong toriti ia katei ka surok ha ki rynsan social media.

Na ka liang ka Kong Bindas Syiem mynta ka sngi ryngkat kiwei kiwei kiba kyrshan ia ka, ka la hiar da lade ban leit jurip ha ki bynta ba siang rong torti ia ka surok ha ki bynta jong ka Shnong Plasha bad kumba la saphriang ki durkhih ha ki rynsan social media la lap ruh ba ka don shisha ka jingpyntrei torti ha kaba siang rong ia katei ka surok ba na ka liang ka Kong Bindas Syiem ka la pynpaw ia ka jingsngewsih kaba khraw.

Ha kane ka jingleit jurip ki la lap da la ki jong ki khmat ba ka ruko siang rong ka la long kaba torti bad la lah ban shu khoh da ka kti briew bad kane hi ka pynpaw ba ka don kata ka jingleh torti da u Contractor ba pyntrei bad siang rong ia kane ka surok.

Haba kren sha ki lad pathai khubor, ka Kong Bindas Syiem, ka la ong ba kum ka longkmie kaba la len ia lade ban shah thnang na ka bynta ban ioh ia katei ka surok rong kaba thymmai, ka dap shisha da ka mynsiem jong ka jingsngewsih halor kane ka jingpyntrei torti ia ka surok bad kane ka jingpyntrei torti ia ka surok kan nym ai jinghun satia ia ki paidbah nongshong shnong jong katei ka thain hi baroh kawei.

Ka la ong ruh ka ai khublei kyrpang naduh ka sorkar jylla bad ia u Bah Prestone Tynsong, uba la pynurlong shisha ia kane ka jingdawa ban siang rong ia katei ka surok, ha ka ka jingleit shah thngan jongka ha Secretariat Shillong bad kumba la lap mynta pat hadien ba ka sorkar ka la ai ia ka surok ka long pat kaba sngewsih ban iohi ne lap halor kine ki kam leh torti ban siang rong ia kane ka surok.

“Kum kine ki jingpyntrei torti ia ka surok ka long kaba ym lah ban pdiang da shisha, namar kane ka surok ka dei ka surok kaba pyndonkam da baroh ki paidbah ba leit ba wan ha ka pang ka shitom ne ha kino kino ki bynta bad ka long ruh kaba sngewsih ban iohi ne lap ia kum kine ki kam leh torti” ong ka Kong Bindas Syiem.

Ka la iathuh ruh ba kane ka jingpyntrei torti la lap teng ruh ha ka por ba ki buh ia ki humpipe, ha kaba la ujor sha u Contractor ha ka surok ba hap ha jan Plasha bad mynta ruh ha ka por ba siang rong ruh la lap biang ia ka jingleh toriti ba kane ka paw shisha ia kata ka jingleh toriti ia ka kam.

Shuh shuh, ka la ong ruh ba ha kane ka jingwan jurip u Manager jong u Contractor u la kular ban leh bha ruh ha kitei ki bynta ba siang rong torti bad ha kajuh ka por ruh ka kyrpad ia u Contractor ba um dei ban shuh leh torti bad dei ban leh janai bad ka jingioh ia kane ka surok kam dei ban pynsngewsih ia ki paidbah nongshong shnogn katei ka thain bad ka dei ban ai jingkmen ia ki paidbah da kaba trei janai ia kane ka surok, ka la bynrap.