Nongpoh, K’lyngkot 29: Da ka jingshim khia kaba jur ki Pulit halor ka jingioh jingtip kaba bniah, ki Pulit ka Umsohlait Police Station mynta ka step ki la ioh ban kem ia uwei u runar uba la leh ia ki kam sniew  bad ruh ba la dep ban register case ha Mawngap Police Station kaba dei katkum ka Case No. 32(12)22 ba la pynhap ia u ha ka kyndon 323/325 IPC bad  ka kyndon 376 IPC.

Ki Pulit ka Umsohlait ki la ioh ban kem ia une u runar na kawei ka khlaw ba la tip kum ka Kseh Kynjoi kaba don ha Ri Bhoi District bad ruh ba ki la ioh jingtip kaba bniah ba u shaid don ha katei ka khlaw.

Une u runar ba la ioh kem da ki Pulit ka Umsohlait Police Station la tip kyrteng kum u Teibor Mawlong bad kane ka  jingioh kem ruh ka dei hadien ba ki la ioh jingtip kaba bniah ba la pynlong ia ka jingtwet kaba jur ba ki pulit ki la ioh ban kem na katei ka khlaw.

Kumba la pyntip da ki Pulit ka Ri Bhoi, la ong ba une u runar ha ka jingtwet ki Pulit u la pyrshan g ban phet krad  ia lade ban lait na ka jingshah kem ha ki Pulit, hynrei da ka jingtrei bor bah ki Pulit la ioh ban kem suk ia u na katei ka khlaw.

Ha kane ka jingioh kem ia une u runar bad la sakhi da ka jingdon lang kiwei kiba la sakhi, la ioh kurup kawei ka Pistol ba shu shna (Country Made Revolver) bad kawei ka Mobile Phone bad ia une u runar la rah mynta ka sngi sha ka District Court ban bishar kaktum ki kyndon jong ka ain.