Ampati, K’lyngkot 28: Ki bor pyniaid district jong ka South West Garo Hills District ha ka jingiatreilang bad ka tnad Tourism lem bad ka tnad Arts & Culture ka la nang pynkhreh shait shaid ban pynlong ia ka tamasa tlang kaba la tip kum ka Mi Kari ha Student Field, Ampati kaban long ha ka 13 bad 14 tarik u Rymphang 2026.

Ka jingthmu ban pynlong ia kane ka tamasa ka long shibynta ban nang pynneh pynsah ia ka riti dustur bad ban pyniatylli ia ki nongshong shnong, ha kane ka tamasa kin don shibun ki jingpyrngia naduh ka jingpyni ia ki riam, ki sur tynrai lem bad ki jingialehkai tynrai, ki jingiakob shet bam tynrai bapher bapher, ki jingiakob shondur, painting, flower show, Healthy Baby Show bad ki talent show nalor kiwei kiwei ki jingiakob na bynta baroh ki nongshnong shnong.

Shuh shuh, la pyntip ba nalor ki jingiakob kiban don ha kane ka tamasa, kin don ruh ka jingpynbyrngia lyngba ka put ka tem ban shimbynta ruh da ki nongput nongtem jong kane ka thaiñ lyngba ka Meghalaya Grassrots Music Programme (MGMP) bad ruh ka concert ban tem da ki nongtem ba pawnam jong kane ka thaiñ, kaban long ruh kum kawei ka rynsan ia ki samla ban pynpaw ia la ki sap ki phong bad ban kyntiew ia ki nongsengkam sengjam, ki nongrep jong kane ka thain, kin don ruh ki stalls na ki department bapher bapher, ki Self Help Group jong ka South West Garo Hills.