Shillong, Rymphang 03: Ki nongialam ka BJP na Meghalaya, lyngba u Bah Maraiahom Kharkrang, uba dei u nongaiktien ka Party, u la ong ba ka Party ka pynpaw ia ka jingsngewnguh ha ryngkat ka jingai khublei ia ka Nirmala Sitharaman, Myntri kaba bat ia ka pla tyngkat ka sorkar pdeng, kumjuh ruh ia u Narendra Modi, Myntri Rangbah duh ka ri, halor ka jinglah jong ki ban buh ia ka jingpynmang tyngka kaba kyrpang eh na bynta ka jylla Meghalaya, kata ha kane ka dorbar mang tyngka jong u snem 2026/2027.

U Bah Maraiahom Kharkrang, u la ong ruh ba ka long ka jingshisha ba ka ri India, ka la kiew eh ha baroh ki liang bad kata ka dei na ka jingstad jong ki nongialam jong ka sorkar pdeng, ha kaba ka sorkar pdeng ka la ialeh tyngeh ban kyntiew ia ka ri ha baroh ki liang.

“Ha kine ki 12 snem ba la dep hapoh ka jingialam u Narendra Modi kum u Myntri Rangbah duh, ka India ka la kiew stet eh haba iadei bad ka ioh ka kot, ha kaba la lah ban pynkylla dur ha kiba bun ki liang, kata naduh ka rukom iohkam iohjam ki samla, ki kam rep kam riang, kumjuh ruh haba iadei bad ka jingpynpoi bording sha manla ki iing ki sem, ong u Bah Maraiahom Kharkrang.

Nalorkata, u la ong ruh ba BJP Meghalaya ka ai ka jingiaroh ia u Narendra Modi, namar dei hapoh ka jingialam jong u kum u Myntri rangbahduh ka ri, ba ki kam pynroi ki poi sha Meghalaya bad ka ka jylla ka la sdang ban kiew ha baroh ki liang, kata naduh ki lynti synkieng lem bad kiwei pat ki jait kam pynroi.

U la pynkut da kaba ong ha ba kine ki snem ki ban dang wan, ka jylla Meghalaya kan sa ioh shibun ki kam pynroi lyngba ki skim na ka sorkar kmie bad ba kan sa long shisha ka ban ai jingmyntoi ia ki paidbah ha ka jylla hi baroh kawei.