Shillong, Rymphang 03: U MP ka Shillong Parliamentary Constituency u Dr. Ricky AJ Syngkon mynta ka sngi u la kyrpad kyrpang na u myntri ka sorkar pdeng u Giriraj Singh ba dei peit ia ka tnad Textile ba un phai khmat lem ia ki jingduna kiba don hapoh ka National Institute of Fashion Technology (NIFT), Shillong.

Ha ka dorkhas kaba u la phah mynta ka sngi sha utei u myntri ka sorkar pdeng, u Dr. Ricky AJ Syngkon u la pynpaw halor shibun ki jingeh ba ia kynduh katei ka shlem pule ki samla ba kynthup naduh ka jingbym don u Director ba pura, ki jinglaitkam bad ka jingduna ki nongtrei kaba la ktah ia ka jingiaid beit iaid ryntih kane ka shlem pule.

“Ka jingmyntoi ba don kum kine ki shlem pule, ka donkam ia ki nongialam kiba biang ban pyniaid beit iaid ryntih ia ki kam ki jam bad ki jingpule” ong u Dr. Syngkon bad ban khia jur ruh halor ka jingdonkam bandon noh da u Dictor ba pura lyngba ka jingthung pura ka sorkar ia u Dictor ba pura.

Na ka liang u MP u la kyrpad ia ka Ministry of textile ban shim khia halor kitei ki jingduna kiba don ha kane ka shlem pule bad khamtam ban thung da u Director ba purla ka NIFT Shillong bad kiwei kiwei ki kam ba dang hap thungkam khnang ba kane ka shlem pule kan ai jingshisha ka jingmyntoi ia ki samla pule.

Shuh shuh, ha katei ka dorkhas u la pynpaw ba kum kine ki skulbah  la donkam ban pykhlain ia ka rukom treikam bad kum ka NIFT Shillong la donkam ban ia kajuh ka kyrdan kumba long lem kiwei kiwei ha ki jylla ba la paw khnang ba kane kan ai jingmyntoi shisha ia ki samla ka jylla bad wat ha ki jylla shatei lam mihngi ka ri.