Nongpoh, Rymphang 03: Ka Ri Lajong Farmers Produce Organization, Ri Bhoi District hynnin ka sngi ka la pynlong da ka prokram ai jinghikai kaba kyrpang ia ki nongrep halor ki kam shna jingshna, ki kam thain jain bad kiwei kiwei ki kam shna kti kiba long ka jingmyntoi na ka bynta ki nongrep.

Ia kane ka prokram la pynlong ha Ronghalam Umshakait ha Ri Bhoi District bad ha kane ka sngi la pynong ruh ia ka loan mela ban ai jinghikai ia ki nongrep halor ki lad ki lynti kumno ba kin ieng ha la ki jong ki kjat lyngba ki jingmyntoi ba ki ioh na ki Bank ha kaba shim ram bad ban pyntrei ia ki kam rep kam riang ne ki kam shna jingshna bapher bapher.

Haba pynlong ia kane ka prokram ai jinghikai la kyrshan lang da ka tnad Handloom, Handicraft, Shillong bad ruh na ka tnad Sericulture bad Horticulture Ri Bhoi District.

Ha kane ka sngi, la ai jingkren ruh da ki ophisar ban ai jinghikai ia ki nongrep kiba dei halor ki kam shna kti, ki kam thain kti bad kiwei kiwei kiba ai jingmyntoi.

Nalor ki ophisar kiba la wan ban ai jinghikai, ha kane ka sngi la don lang ruh ka Kong Mariam Maring, kaba dei ka president ka Ri Lajong Farmers Produce Organization bad u P.S Toor kum ki nongialam kane ka seng nongrep ha Ri Bhoi District.