Shillong, Rymphang 06: Ka jingdon kiba iap na ka jingbthei ka par Dewiong bad kaba la jia hynnin ka sngi ha Mynsngat ha ki thain Thangsko, East Jaintia Hills, ka la kot sha ka 18 ngut bad kumba ka long mynta, la ong ba ka kynhun National Disaster Response Force (NDRF), State Disaster Response Force (SDRF) bad ka Special Rescue Team (SRT), ki dang bteng ban wad ia kiwei pat ha katei ka jaka ba la don ka jingbthei.

Haba iadei bad katei ka jingjia ba bthei ha par Dewiong, u Vikash Kumar, Superintendent of Police ka East Jaintia Hills, u la ong, ba ka la dei ka jingshisha ba katei ka jingbthei ka la jia ha ka par tih Dewiong ba beain, ha kaba nalor kitei ki 18 ngut ba la lap ia ka metiap jong ki, hynrei la suba ruh ba ki dang don kiwei pat kiba ngat ha katei ka apot.

Kumba ka long mynta, ka kynhun kiba leit ban pynllait im ia kitei ki lanot, ki dang trei khlem sangeh ban pyndep la ka kamram bad haduh mynta ki la lap 18 ngut ki metiap kaba la lap na katei ka jaka, ba la jia ka jingbthei bad kumba ka long mynta, ki la ioh ia uwei briew uba la mynsaw bad mynta uba dang don hapdeng ka jingshah sumar ha Nongbah Shillong, ong u Vikash Kumar.

Shuh shuh, u Vikash Kumar, u la ong ba halor katei ka jingjia, ki Pulit ki la ujor da ka Suo-Motu FIR ha Khliehriat Police Station katkum ka case no 14/2026 U/s 105/118(2)/3(5) BNS R/W section 21/21(1) MMDR Act R/W section 3 Explosives Substances, ha kaba ki la dep ban register ia ka case bad ka jingtohkit kan dang iaid shakhmat.

Nalorkata, na ka liang ki Pulit ki la pynbna ruh ba lada don kino kino kiba don jingtip ia ki briew kiba donkti ha katei ka kam beain, kaba la wanrah ia ka jingbthei bad iap briew, la kyrpad ia ki ba kin pyntip mar mar sha ki Pulit ba marjan, ha kaba yn buhrieh ia ka kyrteng jong ha ryngkat ka kaba ai khusnam na bynta kito kiba ai jingtip sha ki Pulit, u la bynrap.