Shillong, Rymphang 05: Ka PRIME Meghalaya  mynta ka sngi ka la pynlong ia ka prokram kyrpang  ha Nanpolok, Shillong ha kaba la wan ban shim bynta da u Myntri rangbah ka jylla u Conrad K. Sangma kum u kongsan.

Kane ka prokram kaba kyrpang ka dei shi bynta ba ka PRIME ka rakhe ia ka kynhun jong ki 75 ngut (75 start up) ba la shah jied kypang lyngba ka Chief Minister’s E-Championship Challenge 6.0, ha kaba ki la sdang ia ka jingiaid lynti ha kaba seng kam seng jam lajong bad ruh shi bynta ban rakhe ia ka jingpyndep ki 75 ngut ki kynhun lyngba kata ka thong ba la tip kum ka Cohort 5  ha kaba ia dei bad ka jingtrei shitom bad ka jingjop jongki ha ka liang ka seng kam seng jam.

Haba kren ha kane ka sngi, u Myntri rangbah ka jylla u Conrad K. Sangma u la ong, ba ka jingseng kam seng jam lajong ka ai jingmyntoi ia ka jylla bad ka ri, da kaba ong, “ Ba u la ju ioh ia kren na ka por sha ka por bad kito ki samla seng kam seng jam lajong ha kaba ki la pynpaw ba bunsien ki ju mad ia ka jingduhnong, hynrei ka jingtrei shitom bad ka jingiaid shah ha ka kam ka pynlong ia ki ban kiew ha ka liang ka seng kam seng jam lajong”.

U la bynrap ruh ha ki snem ba la leit noh kam ju don kata ka jingkyrshan ha Meghalaya na ka bynta kito ki nongseng kam seng jam lajong, hynrei mynta ka sorkar India ka la don ka jingithuh ia ki nongseng kam seng jam lyngba kata ka entrepreneurship programs jong ka jylla lyngba ki khusnam bad ki jingpynkup burom ba ki ju ioh na ka jylla.

Kum ka jingai mynsiem ia ki samla ba seng kam seng jam lajong, u Myntri rangbah ka jylla u la kyrpad ia ki ba kim dei ban pdiang ia ka jingshah rem lane ban duh mynsiem haba don kiba ym poi sha ka thong, hynrei ki dei ban iaid shaphrang bad ban trei shitom  bad lyngba ki jingeh bad ki jingtynjuh ba ki kynduh kane kan ai mynsiem ia ki ba kin dang lah ban kiew shaphrang ha ki kam ki jam.

Lyngba jong  kane ka sngi, u Myntri Rangbah ka jylla u Conrad K. Sangma u la plie padibah ruh ia ka PRIME Entrepreneur Catalogue bad la pynkup burom ruh ia ki kynhun kiba wan shakhmat ha ka liang ka seng kam seng jam lajong lyngba ka Cohort 5 bad Cohort 6.