Shillong, Rymphang 07: U District Magistrate ka East Jaintia Hills District u la pynmih syndon da ka hukum hapoh ka 163 BNSS hadien ka jingbthei haka par tih dewiong beaiñ kaba la jia haka 5 tarik Rymphang ha Mynsngat, Thangsko kaba hap hapoh Umpleng police Outpost East Jaintia Hills District kaba la wanrah ruh ka jingduh bun ngut ki mynsiem briew bad ruh kiba mynsaw.

Ka ïingbishar ba donburom jong ka jylla Meghalaya, ha ka rai jong ka ha ka tarik 05.02.26, ka la shim ïa ka rai halor ka jingbthei ha ki lai tylli ki par dewiong beaiñ kiba la wanrah ïa ka jingiap briew bad jingmynsaw, bad ka la bthah iaki bor synshar ban shim khia mardor bad leh da kaba tyngeh pyrshah ia baroh ki briew kiba donkti ha ka jingtih dewiong beain.

Shuh shuh naka liang ka ophis u District Magistrate kala ioh ruh shibun ki jingujor naki paidbah lyngba ki social media halor ka jingbteng ka jingtih dewiong beaiñ haka thaiñ Thangsko bad kala don ruh ka jingpynthud da ki kynhun bad ki briew shimet haka por ba khanglad ïaka jingtih dewiong beaiñ, ka por ba kurup ïaki mashin bad ki kali lem bad ki tiar ki tar.

Namarkata naka liang u Manish Kumar District Magistrate katkum ka bor bala pynkup hapoh ka kyndon 163 jong ka Bharatiya Nagarik Suraksha Sanhita u la pynbna ban khang pyrshah ïaka jinglang briew palat ïaka 5 ngut ha kitei ki jaka tih dewiong beaiñ lait noh ki ophisar kiba don haka duty bad la bthah ruh ïa baroh ki majistor ba kin pynlong ka jingjurip haka thaiñ Thangsko bad ba kin kurup ruh baroh ki tiar ba pyndonkam tih dewiong beaiñ bad ban pynngat ruh ïa kiba leh pyrshah katkum ki kyndon aiñ kynthup ruh ka Mines and Minerals (Development and Regulation) Act bad kiwei.

Ki majistor ryngkat ka jingsynran jong ki pulit ki dei ban kem ïaki trai par, ki nongpyniaid, ki nongbei pisa bad baroh ki briew kiba donkti haka kam tih dewiong beaiñ bad kino kino kiba pynkheiñ bad kiba leh pyrshah kin ngat katkum ki kyndon aiñ bad kane ka kyndon aiñ kan treikam naduh mynta tad haduh ban da pynbna da kumwei.