Shillong, Rymphang 09: Ki kynhun pynlait im naduh ka NDRF, SDRF, Sepcial Rescue Team (SRT), ki pulit bad kumjuh ruh ki bor district haduh mynta ki dang bteng ban wad ïaki lanot kiba ngat haka jingbthei ka par dewiong beaiñ haka thaiñ Mynsngat bad Thangsko, bad haduh mynta ym pat shym la lap thymmai ïaki briew kiba ngat ha katei ka jingjia lait noh ki 27 ngut kiba la duh noh ka mynsiem.

Naka liang ka bor District jong ka East Jaintia Hills District kala pynkhlaiñ shuh shuh ïaka jingkhynra ïaki jaka tih dewiong beaiñ ha katei ka thaiñ bad la phah ruh 5 kynhun ki majistor, ki pulit bad ki ophisar naka tnad Directorate of Mineral Resources (DMR).

Ha kane ka jingkhynra, kumba 38 MT u dewiong la ioh ban kurup naki 2 jaka haka thaiñ Lumnongthymme, kumba 87 MT na kawei ka jaka ha Lumbangla bad 17507 MT na 2 jaka haka thaiñ Rangad ryngkat ki tiar ki tar bad kawei ka synjuk kaba suba ba don kumba 204 tylli ki Gelatin Sticks.

Nalor kata, la ithuh bad pynpra ruh ïa ki jaka sah ba shipor ba la pyndonkam ha kaba ïadei bad ki kam tih dewiong beaiñ bad la ujor ruh da ka ejahar ha kaba ïadei bad ka jingtih dewiong beaiñ naka bynta ban leh katkum ki kyndon jong ka aiñ bad naka liang ka sorkar kala siew ruh ïaka bai lutksan kumba T.24 Lakh sha ki 8 ngut ki lanot ha katei ka jingbthei ka par dewiong bad ka jingbteng ban siew sha kiba dang sah ka dang ïaid shakhmat hadien ba ki bahaiing kila pynshisha ïaki kot ki sla.

Shuh shuh ban ïaid beit ka jingkhynra ïaki jaka tih dewiong beaiñ naka liang u District Magistrate ka East Jaintia Hills District u la pynjari ruh da ka kyndon aiñ 163 BNSS bad la kyrpad ruh ïaki paidbah ba kin ai ka jingïatreilang bad ki bor district bad ban kiar ban leit sha kitei ki jaka tih dewiong beaiñ.