Shillong, Rymphang 17: U president ba rangbah ka VPP bad uba dei ruh u MLA ka Nongkrem Constituency u Bah Ardent Miller Basaiawmoit mynta ka sngi u la kynnoh ba ka sorkar jylla ruh ka don kti ha ka kam tih dewiong beain bad ngin nym lah ban khmih lynti na ka jingtohkit ka Commission namar la bun ki Commission ba thung ka sorkar bad khlem sei soh pat.

Ia kane la pynpaw da u Bah Ardent Miller Basaiawmoit haba kren mynta ka sngi sha ki lad pathai khubor ha ka sngi babud jong ka dorbar mang tyngka.

U la ai nuksa ruh ba ka jingbym lah ban shaniah ia ki Commission ne ki Committee ba thung ka sorkar da kaba kren ruh ia ka jingshah siat iap u General Secretary barim ka HNLC U Bah Cheristerfiled Thangkhiew ba la thung da ka Inquiry Commissionerban tohkit bad haduh mynta ym shym la sei soh.

Haba kren ruh halor ka jingdon ka jingtih dewiong beain, u Bah Ardent u la ong ba ki jingshisha ki paw ha ka jingjia ba dang shen ha Mynsngat halor ka jingbthei ka par dewiong bad kane hi ka paw shai ba wat ka sorkar ruh ka don kti lang bad ki trai par dewiong ban tih beain ia u dewiong.

“Ka por kan poi ba ka jingiada ka sorkar halor ki kam tih dewiong beain kin kut noh, namar baroh ki paidbah, ka jylla bad ka ri ki la dep tip halor ka jingdon ka jingtih dewiong beain ha ka jylla” ong u Bah Ardent Miller Basaiawmoit bad da kaba kdew shai ruh halor ka jingjia ha Mynsngat ba ka la don ka jingbthei par dewiong bad ba la wan rah ia ka jingjia ba sngewsih.

U Bah Ardent u la buh ruh ka jingkylli, da kaba ong kumno u Myntri sorkar un kam ba kim don jingtip ia kata ka jingtih dewiong beain bad haduh katno phi lah ban len. Wat la ka sorkar ka pyrshang ban len, hynrei ki paidbah ki la dep tip, ki lum ki la dep tip bad ki wah ki la dep tip, namar ba kala don kata ka jingktah ha ki 12 snem ba la leit  noh na kane ka jingtih dewiong beain.

U Bah Ardent u la dawa ruh ba dei ban leh da kaba tyngeh ia ki heh ophisar jong ki District ba mih u dewiong beain bad lada kim lah ban leh ei ei halor ki jingdon jong kine ki nongtih dewiong beain, ka sorkar ka la dei ban tehlakam naduh ki DC bad ki SP na kine ki saw tylli ki District.

Shuh shuh, ha kane ka dorbar mang tyngka, u Bah Ardent u la buh jingkylli ruh ia u Shongknor ka ïig Dorbar ba um ailad ban iatai halor katei ka jingjia bthei par dewiong bad kane ka paw ba ka sorkar ka len ia ka jingshisha bad kam ju ailad ban iatai haba don kum kine ki mat ba hap ban ia kren ha ing dorbar thaw ain ka jylla, u la bynrap.