Shillong, Rymphang 17: U Myntri Rangbah ka jylla, Conrad K. Sangma, ha ka sngi ba ar u la ong ba ka jingtei ïa ka New Shillong City ka dang ïaid shaphrang bad ka projek kan long ka bynta kaba kongsan ban wanrah jingmyntoi kaba khraw ha ka jylla.

Haba jubab ïa ka jingïakren ba lyngkot ha ïingdorbar thaw aiñ, u Sangma u la pyntip ba ha ka Phase 1, ka Administrative City ka la kynthup ïa ki jaka treikam ba kongsan kum ka Meghalaya Secretariat, IIM Shillong, National Institute of Fashion Technology (NIFT), North Eastern Institute of Ayurveda and Homoeopathy (NEIAH) bad North Eastern Indira Gandhi Regional Institute of Health and Medical Sciences (NEIGRIHMS), kiba la pynlong ïa ka thaiñ kum kawei naki shnong ka jaka sumar bad ka jingstad.

U la ong ba ka projek Meghalaya Secretariat kaba shongdor T.1,231 klur ka la poi haduh 35 percent, katba ka ïingdorbar bathymmai ka la jan dep. Ka thaiñ ka la nang kylla ruh kum ka jaka khaii pateng, ha kaba ka Unity Mall ka la dep kumba 40 percent bad kiwei kiwei ki kam pynroi.

U Myntri Rangbah u la pyntip ba 64.9 acre la buh kyrpang na ka bynta ki jaka pule ba shalor bad ki training centre, katba ka IT Park ka la pynmih haduh 1,500 tylli ki kam.  Ha kaba ïadei bad ki jaka sah ki longiing ba duna ka jingioh haduh 51.68 acre la mang ban tei ïing sah, kynthup 10.9-acre na ka bynta ki iing ba kham bha kaba don 435 tylli ki unit.

Ha ka Phase 2, ka Knowledge City ha Mawkhanu kan don ka IT Park kaba heh, Skills & Innovation Hub, ka monolith tower bad ka stadium phutbol kaba lah ban shong 40,000 ngut bad kine ki jingtei thymmai kin kyntiew ïaka ioh ka kot ka jylla bad pynmih ruh ki kam ki jam kiba bun.

U Myntri Rangbah u la kdew ruh ïa lai tylli ki bynta kiba kongsan eh ba kynthup ïaki surok (connectivity), ka umbam umdih bad ka bording. U la ong ba ka Comprehensive Mobility Plan (CMP) ka la buh ïa ka lynti 30 snem ban pynbha ïa ki surok, kynthup ka surok Ummir-Mawkhanu kaba la dep ha ka jinglut T.201 klur bad ki surok shnong ba shapoh. Ka New Shillong kan ïoh jingmyntoi ruh na ka surok high-speed Guwahati–Shillong–Silchar bad ka jingpynbha ïa ka kad liengsuiñ.

Ha ka bynta umbam umdih, u la ong ba ka Detailed Project Report (DPR) ka kynthup ïa ka jingdonkam jong 32 shnong, ha kaba ka projek kan pynbiang kumba 56 million litar ka um haka shi sngi na ka bynta palat 4 lak ngut ki paidbah. Ka Phase I kaba kaba la mang haduh T.591 klur ka dang ïaid shakhmat yn tan um na Wah Umkhen.

Hakaba ïadei bad ka bording, ka 33 KV Umroh Sub-Station bad ka jingpynheh ïa ki line ka la pynduna ïa ka jinglip bording, bad la thmu ban tei sa ar tylli ki 40 MVA substation ha Mawkhanu bad Umsawli.

U Myntri Rangbah u la ong ba ka Master Plan kaba la pynkhreh ryngkat bad NESAC da kaba pyndonkam da ki GIS ka la buh kyndon ban ym shah tei ha ki jaka ba ma ba jur ka jingshlei um bad ka jingtwa khyndew bad ai khublei ïa ki Dorbar Shnong kiba la ai jingmut halor kane ka bynta.

U Myntri Rangbah u la pynkut da kaba ong ba ka New Shillong City kan dei ka “growth engine” jong ka jylla bad ka jaka pynmih kam kaba heh tam, kaban wanrah ïaki lad jingïoh kam bad la ka kabu sha man ki thliew iing haka jylla.