Nongpoh, Rymphang: Tang mar ia tip halor ka jingkhlad noh kaba kyndit kyndit jong u Dr. Ricky AJ Syngkon, u nongshong shnong na Nongsder bad uba dei ruh u Member of Parliament sha Lok Sabha na Shillong Seat, ki paidbah ka shnong Nongsder hi baroh kawei, ki la sngewsih kthang eh bad mynta ka step, na ka liang ki nongialam ka Dorbar Shnong Nongsder, ki la pynlong ia ka jingialang kaba kyrkieh, ban pynbeit ia ki kam ha shnong ha thaw, na bynta ban pyndep ia ka jinglehniam kaba khadduh ia ka met u Dr. Ricky AJ Syngkon, ka ban long ha shnong Nongsder.
Halor ka jingkhlad u Dr. Ricky AJ Syngkon, ka Dorbar Shnong Nongsder, lyngba u Bah Jonas Lyndem, Rangbah Shnong bad u Bah Wanlang Rymbai, Secretary Shnong, ki la ong ba ka Dorbar Shnong hi baroh kawei, ka phah ia ka kyrwoh khubor sngewlem sha kiba haiing ha sem jong u Dr. Ricky AJ Syngkon bad kiba la ong ruh ba ka shnong kan don ryngkat lem bad ka iing, na bynta ban iarap ha kiba bun ki liang bad khamtam eh haba iadei bad ka sngi ban lehniam khatduh, ka ban dei lashai ka sngi.
Namarkata, na ka liang ka shnong, ka kyrpad ia ki nongwan sngewlem ia ka jinglehniam ba khatduh ia ka met u Dr. Ricky AJ Syngkon, ba kin ai ka jingiatreilang bad ka shnong, namar na ka liang ka shnong ka la pynbiang ia ki jaka ieng kali, da kaba buh ruh ia ki Volunteer ha ryngkat ka jingdon ki briew ka ain, ki ban pynbeit ia ka iaid ka ieng ki kali lashai ka sngi ha Nongsder.
