Nongpoh, Rymphang 20: Ka Federation of Khasi Jaintia and Garo People mynta ka sngi la pynlong da ka jingiaid paidbah ha sor Nongpoh da kaba sdang ban iaid paidbah na phyllaw ka ophis u DTO Nongpoh sha Madan Pahamsyiem na ka bynta ban dawa na ka sorkar ba dei ban pynsted halor ki kam pynbeit pud pynbeit sam hapdeng ka jylla Meghalaya bad ka jylla Assam.

Ha kane ka jingiaid paidbah la wan ban shim bynta naduh u President ba rangbah ka FKJGP u Bah Dundee C. Khongsit, u President ka FKJGP North Khasi Hills District u Bah Lui Star Lyngdoh, ki nongialam ka seng na kiwei kiwei ki district bad kynthup ruh ki nongialam na ka KSU bad RBYF na Ri Bhoi District.

Ha kane ka jingiaid paidbah, ki nongialam seng bad ki dkhot ki la rah ruh ia ki lama bad rygnkat ka jingpyrta ban dawa na ka sorkar jylla ba dei ban  pysnted ia ki kam pynbeit pud kiba la sahteng mynta la bun phew snem.

Ha kane ka sngi, la ai jingkren naduh u President ba rangbah u Bah Dundee C. Khongsit bad kiwei kiwei ki nongialam, hakaba ki la pynpaw ia ka jingsngewkhia na ka jingshah ktah ki paidbah ha ki shnong khappud, kaba dei tang na ka daw ka jingiajia pud ba la ju mih ki jingjia ba sngewsih bad ba  ki nongshong shnong ha khappud ki shah thombor na ka por sha ka por.